«سەرگەك» جوباسى 2023-جىلدىڭ سوڭىندا اياقتالادى
30 ماۋسىم 16:10

«سەرگەك» جوباسى 2023-جىلدىڭ سوڭىندا اياقتالادى

نۇر-سۇلتان. قازاقپارات - نۇر-سۇلتان قالالىق ءماسليحاتىنىڭ دەپۋتاتى المات ءجۇنىسوۆ ەلوردانىڭ ۆيدەوفيكساتسيا جۇيەسىندە ورىن الىپ وتىرعان پروبلەمالاردى كوتەردى، دەپ حابارلايدى قازاقپارات ءتىلشىسى.

«سەرگەك» فوتو-ۆيدەوفيكساتسيا اپپاراتتىق-باعدارلاما كەشەنىن قۇرۋ جانە پايدالانۋ جونىندەگى مەملەكەتتىك-جەكەشەلىك ارىپتەستىك جوباسىن جۇزەگە اسىرۋ جول-كولىك وقيعاسىمەن بايلانىستى ءولىم-ءجىتىمدى، قوعامدىق ورىندارداعى قىلمىستى تومەندەتۋگە مۇمكىندىك بەردى. ءبىراق، ونى ودان ارى بەلسەندى تۇردە جۇزەگە اسىرۋ قاجەتتىلىگى بار. تۇرعىنداردان ەلوردانىڭ تۇرعىن ءۇي الاپتارىنا كامەرالار ورناتۋعا قاتىستى وتىنىشتەر كوپتەپ ءتۇسىپ جاتىر»، - دەدى المات ءجۇنىسوۆ قالالىق ءماسليحات وتىرىسىندا.

ونىڭ اتاپ وتۋىنشە، تۇنگى ۋاقىتتا جۇمىس ىستەپ تۇراتىن كامەرالارعا قاتىستى پروبلەما بار.

«بۇعان قوسا، كامەرالار ەڭ الدىمەن جولداردىڭ ءقاۋىپتى ۋچاسكەلەرىندە، قيىلىستاردا، اپات ءجيى ورىن الاتىن ۋچاسكەلەردە ورناتىلۋى ءتيىس. «سەرگەك» جوباسى بويىنشا قولدانىستاعى كەلىسىمشارت مەرزىمىنىڭ 2023-جىلدىڭ جەلتوقسانىندا اياقتالاتىندىعىنا بايلانىستى قۇرال-جابدىقتارعا تۇگەندەۋ جۇرگىزۋ، ولاردىڭ بولجامدى قىزمەت كورسەتۋ مەرزىمىن بەلگىلەۋ، جەرگىلىكتى بيۋجەتكە الداعى ۋاقىتتا قوسىمشا جۇكتەمەگە جول بەرمەۋ ماقساتىندا تەحنيكالىق جاي-كۇيىن انىقتاۋ قاجەت. سونىمەن قاتار جوبانىڭ اياقتالاتىندىعىن ەسكەرە وتىرىپ، جاڭا جوبانى ونى كەڭەيتۋ ءارى جاڭعىرتۋ مۇمكىندىگىمەن ازىرلەۋ كەرەك»، - دەدى دەپۋتات.

جاڭالىقتار