ەلوردادا 2023-جىلعا دەيىن قانشا شارشى مەتر باسپانا سالىنادى؟
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ەلوردانىڭ 2019-2023-جىلدارعا ارنالعان جيناقى قۇرىلىسى جونىندەگى كەشەندى جوسپارى جوباسىن تانىستىرعان استانا اكىمى باقىت سۇلتانوۆ ايتتى، دەپ حابارلايدى قازاقپارات ءتىلشىسى.
«ەكونوميكا مەن سالىق سالىناتىن بازا ءوسىمىنىڭ كۇتىلەتىن قارقىنى جەرگىلىكتى بيۋجەت كىرىسىنىڭ 43,7 پايىزعا، 355 ميلليارد تەڭگەگە دەيىن ۇلعايۋىن قامتاماسىز ەتەدى. استانا قالاسىنان رەسپۋبليكالىق بيۋجەتكە جىل سايىنعى تۇسىمدەر 14 پايىزعا، 2018-جىلعى 823 ميلليارد تەڭگەدەن 2023-جىلى 940 ميلليارد تەڭگەگە دەيىن وسەدى. سونىمەن قاتار، الداعى 5 جىلدىڭ ىشىندە ەلوردانىڭ دامۋىنا شامامەن 6 تريلليون تەڭگە جەكە ينۆەستيتسيا سالىنادى»، - دەدى قالا باسشىسى.
وسىلايشا، ونىڭ دەرەگىنشە، 1 تەڭگە مەملەكەتتىك ينۆەستيتسياعا 4-5 تەڭگە جەكە كاپيتال سالىناتىن بولادى. ءوز كەزەگىندە، بۇل الەۋمەتتىك جانە ينجەنەرلىك ينفراقۇرىلىمنىڭ كەڭەيۋىنە، سونداي-اق تۇرعىن ءۇي قۇرىلىسىنىڭ وسىمىنە مۇمكىندىك تۋعىزادى.
«اۋماقتاردا بەلسەندى قۇرىلىس سالۋ 2023-جىلعا دەيىن شامامەن 10 ميلليون شارشى مەتر تۇرعىن ءۇي ەنگىزىلىمىن قامتاماسىز ەتەدى. كولىكتەندىرۋ دەڭگەيىنىڭ 8-9 پايىزعا دەيىن جىل سايىنعى ۇلعايۋىن ەسكەرە وتىرىپ، 2023-جىلعا دەيىن 121 شاقىرىم جول، 2 جول ايرىعىن، 3 كوپىر، 1 جول وتپەسىن، 1 جەر استى جولىن سالۋ جانە 1 اينالما جولدى اياقتاۋ جوسپارلانۋدا. كولىك قاڭقاسىن قۇرۋ ەلوردا جولدارىندا كولىكتىك كوللاپستىڭ تۋىنداۋىنا جول بەرمەۋدى جانە قالانىڭ نەگىزگى ماگيسترالدارىنان 50 پايىزعا جۇكتەمەنى تومەندەتۋگە مۇمكىندىك بەرەدى»، - دەدى باقىت سۇلتانوۆ.