دارىگەرلەردىڭ جالاقىسى 2023 -جىلى 561 مىڭ تەڭگەگە جەتەدى
بۇل تۋرالى بۇگىن ق ر دەنساۋلىق ساقتاۋ مينيسترلىگىنىڭ كەڭەيتىلگەن القا وتىرىسىندا ۆەدومستۆو باسشىسى الەكسەي سوي ايتتى، دەپ حابارلايدى قازاقپارات ءتىلشىسى.
دەنساۋلىق ساقتاۋ ءمينيسترى مەملەكەت باسشىسى بيىلدان باستاپ دارىگەرلەردىڭ جالاقىسىن كەزەڭ- كەزەڭىمەن كوتەرۋ مىندەتىن قويعانىن ەسكە سالدى.
«2023 -جىلعا قاراي دارىگەرلەردىڭ جالاقىسى ەكونوميكاداعى ورتاشا جالاقىدان ەكى جارىم ەسە جوعارى دەڭگەيگە جەتەدى دەپ بولجانۋدا. ماسەلەن، 247 مىڭ مەديتسينا قىزمەتكەرىنىڭ جالاقىسىن كوتەرۋگە رەسپۋبليكالىق بيۋدجەتتە ءتيىستى شىعىستار كوزدەلگەن: 2021 -جىلى - 222 ميلليارد تەڭگە، 2022 -جىلى - 362 ميلليارد تەڭگە، 2023 -جىلى - 557 ميلليارد تەڭگە. وسىلايشا، 2021 -جىلى دارىگەرلەردىڭ ورتاشا جالاقىسى شامامەن 320 مىڭ تەڭگە بولادى. 2023 -جىلى 561 مىڭ تەڭگەگە دەيىن جەتەدى. 2021 -جىلى ورتا مەديتسينا قىزمەتكەرلەرىنىڭ ورتاشا جالاقىسى 173 مىڭ تەڭگە، 2023 -جىلى 210 مىڭ تەڭگەگە جەتەدى»، - دەدى الەكسەي سوي.
اۆتور: مارلان جيەمباي