قازاقستاندىقتار 2022-جىلى قانشا مىڭعا جۋىق التىن قۇيما ساتىپ الدى
ۆەدومستۆو مالىمەتىنشە، 2022-جىلى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتتەرىندە جالپى سالماعى 1,1 توننا 37940 التىن قۇيما ساتىلعان.
حالىققا تازارتىلعان التىن قۇيمالاردى ساتۋ جانە كەرى ساتىپ الۋ باعدارلاماسىن ۇلتتىق بانك 2017-جىلى ىسكە قوسقان بولاتىن. باعدارلاما قولعا الىنعالى جالپى سالماعى 3,8 توننادان استام 112845 التىن قۇيما ساتىلدى.
ساتىپ الۋشىلار اراسىندا ەڭ كوپ سۇرانىسقا يە ءتۇرى - 5 گرامدىق التىن قۇيما. جالپى، ساتىلعان قۇيمالار اراسىندا ونىڭ ۇلەسى 30,5 پايىز - 11558 دانا. ودان كەيىن 20 گرامدىق التىن قۇيمادان ساتىلعانى - 8605 دانا (23 پايىز)، 10 گرامدىق قۇيمادان - 8548 دانا (22,5 پايىز)، 100 گرامدىق قۇيمادان - 6462 دانا (17 پايىز)، ال 50 گرامدىق قۇيمادان - 2767 دانا (7 پايىز). التىن قۇيمالار الماتى، استانا جانە قاراعاندىدا كوپ ساتىلادى.
التىن قۇيمالار سەنىمدى ينۆەستيتسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى - بانك پەن بانكتىك ەمەس ايىرباستاۋ پۋنكتتەرى كليەنتكە اقشانى سول كۇنى تولەي وتىرىپ، قۇيمالاردى كەرى ساتىپ الا الادى.
2022-جىلى ەكىنشى دەڭگەيلى بانكتەر مەن بانكتىك ەمەس جەكەلەگەن پۋنكتتەر جالپى سالماعى 201,4 كەلى 7703 التىن قۇيمانى كەرى ساتىپ العان، بۇل - 2022-جىلى ساتىلعان التىن قۇيمالاردىڭ 20,3 پايىزى. كەرى ساتىپ الىنعان التىن قۇيمانىڭ بارلىعى ۇلتتىق بانكتىڭ فيليالدارىنا قايتارىلماي-اق، قايتادان حالىققا ساتىلدى.
ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپقا سالىنىپ شىعادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعاپ تۇراتىن قوراپ، سونداي-اق، ساپا سەرتيفيكاتى. سوندىقتان التىن قۇيمانى ۇقىپتى ساقتاپ، قورابىن بۇلدىرمەۋگە كەڭەس بەرەمىز.
قازىر التىن قۇيمالاردى ءبىرقاتار ەكىنشى دەڭگەيلى بانكتەر، سونداي-اق، بانكتىك ەمەس جەكەلەگەن پۋنكتتەردەن ساتىپ الىپ، كەرى ساتۋعا بولادى.