قاتار-2022: مەسسي باستاعان ارگەنتينا شيرەك فينالعا شىقتى
4 جەلتوقسان, 10:05

قاتار-2022: مەسسي باستاعان ارگەنتينا شيرەك فينالعا شىقتى

ورال. قازاقپارات - قاتاردا فۋتبولدان ءوتىپ جاتقان الەم چەمپيوناتىندا 1/8 فينالدا ارگەنتينا مەن اۋستراليا كوماندالارى كەزدەستى، دەپ حابارلايدى قازاقپارات ءتىلشىسى.

بىرىنشىلىكتى كۇتپەگەن جەردەن ساۋد ارابياسىنان جەڭىلىپ، ءساتسىز باستاعان ارگەنتينا قۇراماسى كەيىنگى ەكى ويىندا جاعدايىن تۇزەپ، ءوز توبىندا ءبىرىنشى ورىنعا يە بولدى.

اۋستراليا D توبىندا دوپ ايىرماسى بويىنشا فرانسيانى العا جىبەرىپ، پلەي- وفقا جولداما العان ەدى.

ارگەنتينا مەن اۋستراليانىڭ وسىعان دەيىن 7 رەت جولدارى توقايلاسقان. ءتورت جولداستىق كەزدەسۋدىڭ ۇشەۋىندە ارگەنتينالىقتار جەڭىسكە جەتىپ، بىرەۋى اۋستراليالىقتاردىڭ پايداسىنا شەشىلگەن.

1993 -جىلى 1994 -جىلعى الەم چەمپيوناتىنا جولداما الۋ ءۇشىن قۇرلىقارالىق باسەكەدە اۋستراليا ءوز الاڭىندا تەڭ تۇسكەن. سىرت الاڭدا ءبىر عانا دوپ ايىرماسىمەن ەسە جىبەرگەن.

ال 2005 -جىلى كونفەدەراتسيا كۋبوگىندە ارگەنتينا ءىرى ەسەپپەن (4:2) ۇتقان بولاتىن.

سپورتتىق جولىندا مىڭىنشى مارتە جاسىل الاڭعا شىققان ارگەنتينا كاپيتانى ليونەل مەسسي مىقتى ەكەندىگىن تاعى ءبىر دالەلدەدى.

35-مينۋتتا ادەمى ۇيىمداستىرىلعان شابۋىلدان كەيىن مەسسي قاقپا بۇرىشىن ءدال كوزدەدى - 1:0. بۇل ونىڭ 789-ىنشى، الەم چەمپيوناتىنداعى 9-ىنشى گولى ەدى.

ەكىنشى كەزەڭدە 57-مينۋتتا اۋستراليالىق قاقپاشى ءارى كاپيتان مەتيۋ راياننىڭ قاتەلىگىن پايدالانعان حۋليان الۆارەس ەسەپتى 2:0 گە جەتكىزدى.

دەگەنمەن الاڭعا تىڭنان قوسىلعان اۋستراليالىق شابۋىلشى كرەيگ گۋدۆين 77-مينۋتتا تەپكەن دوپ ارگەنتينالىق قورعاۋشى ەنتسو فەرناندەسكە ءتيىپ، قاقپادا تۋلاپ جاتتى.

بۇل اۆتوگول ەسەبىندە جازىلدى. بەس مينۋتتان كەيىن ليساندرو مارتينەس ارگەنتينا قاقپاسىن امان الىپ قالدى.

89-مينۋتتا كەرەمەت ويناعان مەسسيدەن پاس العان لاۋتارو مارتينەس ۇرىمتال ساتتە ءدال تەبە المادى. تارتىستى ويىن بۇدان كەيىن دە باسەڭسىگەن جوق.

وسىلايشا، اۋستراليانى 2:1 ەسەبىمەن جولدان تايدىرعان ارگەنتينا 9-جەلتوقساندا نيدەرلاند قۇراماسىمەن جارتىلاي فينال جولداماسىن ساراپقا سالادى.

ەسكە سالا كەتەيىك، بۇدان بۇرىن برازيليانىڭ ەكى فۋتبولشىسى الەم چەمپيوناتىنىڭ قالعان ويىندارىنا قاتىسا المايتىنىن جازعان بولاتىنبىز.

سونداي- اق ليونەل مەسسي سپورت كارەراسىندا مىڭىنشى مارتە جاسىل الاڭعا شىقتى.


جاڭالىقتار