قاتار-2022: پورتۋگاليا قۇراماسى ۋرۋگۆايدى جەڭە الا ما

استانا. قازاقپارات - قاتاردا ءوتىپ جاتقان فۋتبولدان 2022 -جىلعى الەم چەمپيوناتىندا 28-قاراشادا H توبىندا ەكىنشى تۋر ويىندارى وتەدى، دەپ حابارلايدى قازاقپارات ءتىلشىسى.

اتالعان توپتاعى وڭتۇستىك كورەيا جانە گانا كەزدەسۋى ەلوردا ۋاقىتىمەن 19:00-دە «Qazaqstan» جانە «Qazsport» تەلەارنالارىنان تىكەلەي ەفيردە كورسەتىلەدى.

كەزدەسۋ ەر-رايان قالاسىنداعى 44667 جانكۇيەرگە ارنالعان «ەديۋكەيشن سيتي» ستاديونىندا وتكىزىلەدى.

باس تورەشى - انگليالىق ەنتوني تەيلور. وعان وتانداستارى گاري بەسۆيك پەن ادام نانن كومەكشىلىك جاسايدى. قوسالقى تورەشى - پەرۋلىك كيەۆين ورتەگا.

ەكى قۇراما بۇعان دەيىن ەكى مارتە كەزدەستى. 2011 -جىلى وتكەن جولداستىق كەزدەسۋدە وڭتۇستىك كورەيا 2:1 ەسەبىمەن جەڭسە، 2014 -جىلى گانا قۇراماسى 4:0 ەسەبىمەن باسىم ءتۇستى.

بۇل توپتاعى پورتۋگاليا مەن ۋرۋگۆاي كەزدەسۋى ەلوردا ۋاقىتىمەن 1.00-دە «Qazsport» تەلەارناسىنان تىكەلەي ەفيردە كورسەتىلەدى.

كەزدەسۋ لۋسايل قالاسىنداعى 88966 جانكۇيەرگە ارنالعان «لۋسايل ايكونيك» ستاديونىندا وتكىزىلەدى. باس تورەشى - يراندىق اليرەزا فاگاني.

ەكى قۇراما بۇعان دەيىن ءۇش مارتە شەبەرلىك بايقاستى. قۇرامالار ءبىر-ءبىر مارتەدەن جەڭىسكە جەتسە، ءبىر كەزدەسۋ تەڭ ناتيجەمەن اياقتالدى.

ايتا كەتسەك، 28-قاراشادا G توبىندا ەكىنشى تۋر ويىندارى وتەدى.