قاتار-2022: پولشا قۇراماسى ساۋد ارابياسىنان باسىم ءتۇستى
العاشقى تۋردا پولشا مەكسيكامەن 0:0 ەسەبىمەن تەڭ ويناسا، ساۋد ارابياسى ارگەنتينانى 2:1 ەسەبىمەن ءسۇرىندىردى.
بۇگىنگى كەزدەسۋدە ەكى قۇرامانىڭ دا جەڭىسكە جەتۋگە بار كۇشىن سالاتىنى انىق ەدى. پولشا باسىم تۇسسە، تۋرنير كەستەسىندەگى جاعدايىن جاقسارتىپ الاتىن ەدى. ال ساۋد ارابياسى تاعى ءبىر مارتە ءۇش ۇپايدى ولجالاعان جاعدايدا پلەي- وفف ساتىسىنا بەرىلەتىن جولدامانى ەرتە قالتاعا باسىپ ۇلگەرەتىن.
ويىننىڭ باستاپقى كەزەڭىندە ساۋد ارابياسى بەلسەندى قيمىلىمەن كوزگە ءتۇستى. دەسە دە ەسەپتى العاشقى بولىپ پولشالىق قۇراما اشتى. كەزدەسۋدىڭ 39-مينۋتىندا پولشالىق روبەرت ليەۆاندوۆسكيدىڭ بەرگەن پاسىن ارىپتەسى پەتر زەلينسكي قاقپا تورىندا تۋلاتتى.
ال 45-مينۋتتا ساۋد ارابياسى قۇراماسى ساپىنان سالەم ال ديەۆساري پەنالتيدەن ءمۇلت كەتتى.
ەكىنشى كەزەڭدە قۇرامالار شابۋىلعا كوبىرەك كوڭىل ءبولدى. ەسەپتى وزگەرتەتىن بىرنەشە مۇمكىندىك بولعان ەدى. ولار دىتتەگەن مەجەسىنە جەتپەي جاتتى. ساۋد ارابياسى تارازى باسىن تەڭەستىرۋگە ۇمتىلعان ەدى. ەسەسىنە ءوزىنىڭ قاقپاسىنا گول جىبەرىپ الدى. قورعاۋشىلاردىڭ قاتەلىگىن شەبەر پايدالانعان روبەرت ليەۆاندوۆسكي ءوز قۇراماسىنىڭ باسىمدىعىن ارتتىردى.
وسىلايشا، پولشا قۇراماسى قارسىلاسىنان 2:0 ەسەبىمەن باسىم ءتۇستى.
اتالعان جەڭىستەن كەيىن پولشالىقتار ءتورت ۇپايمەن كوش باسىنا شىقتى.
فوتو: Getty Images
اۆتور
ءادىلجان ۇمبەت