تۇمار-2022 ۇلتتىق سىيلىعىنىڭ جەڭىمپازدارى انىقتالدى
28 ماۋسىم 20:40

تۇمار-2022 ۇلتتىق سىيلىعىنىڭ جەڭىمپازدارى انىقتالدى

نۇر-سۇلتان. قازاقپارات - ەلوردادا «تۇمار-2022» ۇلتتىق تەلەۆيزيالىق سىيلىعىنىڭ جەڭىمپازدارى ماراپاتتالدى، دەپ حابارلايدى قازاقپارات ءتىلشىسى.

تەلەۆيزيالىق شەبەرلىك ءۇشىن بەرىلەتىن «تۇمار-2022» ۇلتتىق سىيلىعىندا 10 نوميناتسيا بار. بيىل سىيلىق الۋعا 300 گە جۋىق ءوتىنىم كەلىپ تۇسكەن، ەڭ كوپ ءوتىنىم «ۇزدىك دەرەكتى فيلم»، «ۇزدىك اقپاراتتىق باعدارلاما»، «ۇزدىك الەۋمەتتىك جوبا»، «ۇزدىك تەلەجۋرناليست»، «ۇزدىك تەلەجۇرگىزۋشى» نوميناتسيالارى بويىنشا قابىلدانعان.

ەڭ الدىمەن ق ر پرەمەر-ءمينيسترىنىڭ ورىنباسارى ەرالى توعجانوۆ «ۇزدىك دەرەكتى فيلم» اتالىمىنىڭ جەڭىمپازىن جاريالادى.

مۇندا «ATYRAY» تەلەارناسى تۇسىرگەن «كاسپيدەن كەتكەن قىپشاقتار» فيلمى توپ جاردى.

«ۇزدىك اقپاراتتىق باعدارلاما» جۇلدەسىنە ASTANA TV تەلەارناسىنىڭ «Saraptimes» باعدارلاماسى لايىق دەپ تانىلدى.

مۇسىنشەنى نۇر-سۇلتان قالاسىنىڭ اكىمى التاي كولگىنوۆ تابىستادى.

«ۇزدىك الەۋمەتتىك جوبا» اتالىمىندا «ك ت ك» تەلەارناسىنىڭ «داۋ-دامايسىز» جوباسى كوش باستادى.

ونى پرەزيدەنت تەلەراديوكەشەنىنىڭ باس ديرەكتورى راۋشان قاجىبايەۆا تابىس ەتتى.

«ۇزدىك توك-شوۋ» جۇلدەسىن جۋرناليست كەمەلبەك ويشىبايەۆ بەردى، بۇل جۇلدەنى «Atameken Business» تەلەارناسىنىڭ «ۆرەميا گوۆوريت» جوباسى جەڭىپ الدى.

«ۇزدىك ويىن-ساۋىق باعدارلاماسى» اتالىمىندا «الماتى» تەلەارناسى ازىرلەگەن «Almaty Bala Fest» جوباسى ۇزدىك اتاندى. جۇلدەنى ق ر پارلامەنتى سەناتىنىڭ دەپۋتاتى دانا نۇرجىگىت تاپسىردى.

«ۇزدىك تەلەۆيزيالىق سەريال» سىيلىعىن تابىستاۋ ءۇشىن ساحناعا «ەكسپرەسس-ك» گازەتىنىڭ باس رەداكتورى الەكساندر اكسيۋتيتس شاقىرىلدى.

مۇندا قازىلار القاسىنىڭ شەشىمىمەن «Qazaqstan» ۇلتتىق تەلەارناسى تۇسىرگەن «احمەت. ۇلت ۇستازى» ۇزدىك سەريال اتاندى.

سونىمەن بىرگە، ايماقتار اراسىندا «Turkistan» تەلەارناسى «ۇزدىك ايماقتىق تەلەارنا» اتاندى. بۇل سىيلىقتى AMANAT پارتياسىنىڭ اتقارۋشى حاتشىسى اسحات ورالوۆ بەردى.

«ۇزدىك رەجيسسەرلىك جۇمىس» نوميناتسياسىندا «Qazaq TV» تەلەارناسىنىڭ «جەنا» جوباسى توپ جاردى.

«ۇزدىك تەلەجۋرناليست» جۇلدەسىن ق ر پارلامەنت ءماجىلىسىنىڭ دەپۋتاتى دارحان مىڭباي تابىس ەتتى.

مۇندا «حابار 24» تەلەارناسىنىڭ وڭتۇستىك كورەياداعى مەنشىكتى ءتىلشىسى ۆلاديسلاۆ سوي جەڭىمپاز اتاندى.

ۆ. سوي سالتاناتتى ماراپاتتاۋ كەشىنە سەۋلدەن تىكەلەي ەفيرگە شىقتى. كەش سوڭىندا «ۇزدىك تەلەجۇرگىزۋشى» اتالىمىندا «31- ارنا» تەلەجۇرگىزۋشىسى اسقار مەڭدىبايەۆ جەڭىمپاز اتاندى. جۇلدەنى ق ر اقپارات جانە قوعامدىق دامۋ ءمينيسترى اسقار وماروۆ تابىستادى.

سونداي-اق «ءادىل قازى القاسىنىڭ ارنايى سىيلىعى» «بالاپان» تەلەارناسىنا بەرىلدى. ارنايى سىيلىقتى تابىستاۋ مارتەبەسى ەرلان قارينگە بەرىلدى.

ايتا كەتەيىك، «تۇمار» جۇلدەسىن ماراپاتتاۋ كەشىندە «بالالار جىلىنا» ەرەكشە ءمان بەرىلدى. كەشتى بالالار جۇرگىزدى جانە بارلىق جەڭىمپازدار بالالارمەن ساحناعا شىقتى.

ايتا كەتەيىك، «تۇمار» ۇلتتىق تەلەۆيزيالىق بايگەسى 2017-جىلى قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ باستاماسىمەن قۇرىلعان.

سىيلىق جەڭىمپازدارى قازاقستاندىق تەلەۆيزيانى دامىتۋعا قوسقان ۇلەسى ءۇشىن «تۇمار» مۇسىنشەسى مەن 1 ميلليون تەڭگە كولەمىندە اقشالاي سىياقى الادى.


جاڭالىقتار