بەيجىڭ-2022: بەيجىڭدە تاعى ءبىر سپورتشى دوپينگ كۇدىگىنە ءىلىندى

None
None
نۇر-سۇلتان. قازاقپارات - بەيجىڭ قالاسىندا ءوتىپ جاتقان قىسقى وليمپيادا ويىندارىندا تاعى ءبىر سپورتشىدان دوپينگ بەلگىسى انىقتالدى، دەپ حابارلايدى قازاقپارات.

حالىقارالىق تەستىلەۋ اگەنتتىگىنىڭ (ITA) مالىمەتتەرىنە سۇيەنسەك، بەيجىڭ وليمپياداسىندا ۋكراينالىق بوبسلەيشى ليديا گۋنكونىڭ تەست قورىتىندىسى وڭ ناتيجە كورسەتكەن.

گۋنكونىڭ دوپينگ تەستىنەن ديگيدروتەستوستەرون (تەستوستەروننىڭ بەلسەندىرەك ءتۇرى) تابىلعان. تەست 14- اقپاندا الىنعان. ناتيجەسى 17- اقپاندا بەلگىلى بولعان.

وسىلايشا، سپورتشى جارىستاردان شەتتەلدى. بۇل ۋكراينالىق سپورتشىلار اراسىنان دوپينگ بەلگىلەرى تابىلعان ەكىنشى سپورتشى. وسىعان دەيىن شاڭعىمەن جۇگىرۋدەن ۋكراينالىق ۆالەنتينا كامينسكايا دا بەيجىڭ-2022 قىسقى ويىندارىنان ۋاقىتشا شەتتەتىلگەن بولاتىن. وندا شاڭعىشىنىڭ اعزاسىنان مەستەرولون مەن گەپتامينول تابىلعان.

بۇل ورايدا ايتا كەتەيىك، وسىعان دەيىن رەسەيلىك مانەرلەپ سىرعاناۋشى كاميلا ۆاليەۆانىڭ دا باسى داۋعا قالعان بولاتىن. الايدا وعان جەكەلەي سىندا ونەر كورسەتۋگە جارىسقا ءبىر كۇن قالعاندا رۇقسات بەردى. ۆاليەۆا كوماندالىق جارىستان كەيىن دوپينگ داۋىنا ىلىككەن ەدى.

ەستەرىڭىزگە سالا كەتەيىك، وسىعان دەيىن يراندىق تاۋ شاڭعىشى حۋسسەين ساۆەح-شەمشاكيدىڭ تەستى وڭ ناتيجە كورسەتكەنىن جازعان بولاتىنبىز.

اۆتور: كۇنسۇلتان وتارباي

سوڭعى جاڭالىقتار