بەيجىڭ-2022: بۇگىن قازاقستاندىق سپورتشىلار قالاي ونەر كورسەتتى
اتاپ ايتساق، بۇگىن ەرلەر اراسىندا شاڭعى قوسسايىسى مەن شاڭعى اكروباتيكاسىسىنان جارىستار ءوتتى. شاڭعى قوسسايىسىندا شىڭعىس راقپاروۆ ەل نامىسىن قورعاسا، شەرزود حاشيربايەۆ ەل نامىسىن قورعادى.
قازاقستاندىق سپورتشىلاردان ءبىرىنشى بولىپ جارىس الاڭىنا جالعىز راقپاروۆ شىقتى.
ول شاڭعى قوسسايىسىنىڭ ءبىرىنشى تۇرىنندە، ياعني ۇلكەن ترامپليننەن سەكىرۋدە 69.6 ۇپاي جينادى. ناتيجەسىندە 38-ورىنمەن شەكتەلدى. بۇل بۇل باعدارلامادا ۇزدىك ناتيجەنى نورۆەگيا وكىلى يارل ماگنۋس ريبەر (139,8) كورسەتسە، ەكىنشى ورىن ەستونيالىق اتلەت كريستيان يلۆەسكە (128,7) بۇيىردى. ال ۇزدىك ۇشتىكتى جاپونيالىق ريوتا ياماموتو (128,7) تۇيىندەدى.
شاڭعى قوسسايىسىنىڭ ەكىنشى كەزەڭىندە، گۋندەرسەن جۇيەسى بويىنشا (10 شاقىرىم) سىنعا تۇسكەن وتانداسىمىز شىڭعىس راكپاروۆ مارە سىزىعىن جەڭىمپازدان 7:35,2 ەسەبىمەن ۇتىلىپ، 43-بولىپ مارەگە جەتتى. وسىلايشا كوسسايىستىڭ قورىتىندىسى بويىنشا جارىستى نورۆەگيالىق يورگەن گرااباك جەڭدى. ەكىنشى ورىن لۋرااس وفتەبروعا (نورۆەگيا) تيەسىلى. ءۇشىنشى ساتىعا جاپوندىق اكيتو ۆاتابە كوتەرىلدى.
بۇل راقپاروۆتىڭ بەيجىڭ وليمپياداسىنداعى سوڭعى مۇمكىندىگى بولاتىن. الايدا جۇلدەلى ورىندارعا قول جەتكىزە المادى.
ودان كەيىن شاڭعى اكروباتيكاسىنان وتكەن باسەكەلەرگە كوز تىكتىك. بۇل سىندا 18 جاسار قازاقستاندىق شەرزود حاشيربايەۆ ەل نامىسىن قورعادى.
اتالعان دودانىڭ ءبىرىنشى ىرىكتەۋىندە حاشيربايەۆ فينالعا تىكەلەي جولداما الاتىن ەڭ ۇزدىك التى اتلەتتىڭ قاتارىنا ىلىگە العان جوق. ول 109.74 ۇپاي جيناپ، 15- ورىنعا تۇراقتادى. ال ەكىنشى ىرىكتەۋ سىنىندا سپورتشى قاتەلىك جىبەرىپ، تورەشىلەر شەشىمىمەن تەك 69.23 ۇپايعا يە بولدى. ول جارىستى 13-ورىندا اياقتاپ، فينالدان تىس قالدى.
جالپى قورىتىندى بويىنشا سپورتشىمىز وليمپيادا ويىندارىن 19-ورىنمەن اياقتاپ تۇر. سونىمەن بۇگىن قازاقستاندىقتار وليمپياداداعى فريستايل جارىسىن تولىعىمەن اياقتادى.
ەستەرىڭىزگە سالا كەتەيىك، كەشە فريستايلدان ايەلدەر اراسىنداعى كىل مىقتىلار انىقتالعان بولاتىن. الايدا، قازاقستاندىق جانبوتا الدابەرگەنوۆا ەكىنشى ىرىكتەۋ كەزەڭىنەن وتە الماي قالسا، اقمارجان قالمۇرزايەۆا فينالدىق كەزەڭنەن سۇرىنگەن بولاتىن.
اۆتور: كۇنسۇلتان وتارباي