2022-جىلدىڭ ءبىرىنشى توقسانىندا ينفلياتسيا شارىقتاۋى مۇمكىن - ۇلتتىق بانك
ق ر ۇلتتىق بانكى وسىنداي بولجام ايتىپ وتىر، دەپ حابارلايدى قازاقپارات ءتىلشىسى.
«باعا ءوسىمىنىڭ اعىمداعى سەرپىنىن ەسكەرە وتىرىپ، ۇلتتىق بانك ينفلياتسيانىڭ 2021-جىلدىڭ قورىتىندىلارى بويىنشا 8,5-8,7 پايىز شەگىندە قالىپتاساتىنىن كۇتۋدە. ۇكىمەت پەن جەرگىلىكتى اتقارۋشى ورگاندار ينفلياتسياعا قارسى دەن قويۋ شارالارى كەشەنىن ودان ءارى ءتيىمدى ىسكە اسىرعان كەزدە ينفلياتسيا بولجامدى دياپازوننىڭ تومەنگى شەگىنە جاقىن قالىپتاسادى»، - دەپ جازىلعان ۇلتتىق بانكتىڭ بازالىق مولشەرلەمە تۋرالى تۇسىندىرمەسىندە.
بانك وكىلدەرى ازىق-تۇلىككە جاتپايتىن تاۋارلار مەن قىزمەتتەردىڭ قىسقا مەرزىمدى ينفلياتسياسى جىل سوڭىنا دەيىن ساقتالاتىنىن بولجاپ وتىر.
«اقىلى قىزمەتتەر قۇنىنىڭ قالىپتى ءوسۋى بولجانادى. ول تۇرعىن ءۇي-كوممۋنالدىق قىزمەتتەر نارىعىنداعى قازىرگى باعانىڭ ساقتالۋىنا نەگىزدەلەدى. سىرتقى ينفلياتسيالىق ورتانىڭ ساقتالۋى، ازىق-تۇلىككە جاتپايتىن نارىقتارداعى ينفلياتسيالىق پروتسەستەردىڭ قارقىن الۋى، تۇتىنۋ بەلسەندىلىگىنىڭ قالپىنا كەلۋى، جوعارى ينفلياتسيالىق كۇتۋلەر جانە تاۋارلار مەن قىزمەتتەردىڭ وزىندىك قۇنىنىڭ ءوسۋى ارقىلى جانار-جاعار ماي باعاسى ءوسۋىنىڭ جاناما اسەرى باعالارعا قاتتى قىسىم كورسەتەدى. كومىر باعاسىنىڭ ىقتيمال ءوسىمى اياسىندا ەلەكتر ەنەرگياسى تاريفتەرىنىڭ بۇدان بىلايعى ءوسۋ تاۋەكەلى بار. 2022-جىلعى ءبىرىنشى توقساندا ينفلياتسيانىڭ ەڭ جوعارى شەگى كۇتىلەدى. سودان كەيىن ونىڭ بىرتىندەپ باسەڭدەيتىنى بايقالادى»، - دەپ جازىلعان ۇلتتىق بانك اقپاراتىندا.
دەگەنمەن قارجى رەتتەۋشىسى ينفلياتسياعا قارسى دەن قويۋ شارالارى ءوز جەمىسىن بەرىپ، 2022-جىلى ينفلياتسيانىڭ دەڭگەيى 6,0-6,5 پايىزعا دەيىن بىرتىندەپ باياۋلايتىنىن بولجاپ وتىر.
«ينفلياتسيانىڭ تومەندەۋىن 2021-جىلى قالىپتاسقان جوعارى بازا ۇستاپ تۇرادى. سونىمەن بىرگە، تاۋارلار مەن قىزمەتتەردىڭ جەكەلەگەن نارىقتارىنداعى تەڭگەرىمسىزدىككە، جاھاندىق جانە جەرگىلىكتى جەتكىزىلىم تىزبەگىنىڭ توپتاپ قالۋىنا جانە جوعارى ينفلياتسيالىق كۇتۋلەردىڭ ساقتالۋىنا بايلانىستى پروينفلياتسيالىق تاۋەكەلدەردى ىسكە اسىرۋ 2022-جىلعى ينفلياتسيانىڭ بولجامدى مانىنەن جوعارى قالىپتاسۋىنا الىپ كەلۋى مۇمكىن. ۇلتتىق بانك كەلەسى شەشىمىن ينفلياتسيالىق كۇتۋلەردىڭ سەرپىنىن، ينفلياتسيانىڭ ورنىقتى قۇرامداس بولىكتەرىن، سونداي-اق ەپيدەميولوگيالىق احۋالدىڭ سىرتقى جانە ىشكى سۇرانىسقا اسەرىن ەسكەرە وتىرىپ قابىلدايدى. كۇتۋلەردىڭ، ينفلياتسيانىڭ جانە ونىڭ ورنىقتى قۇرامداس بولىكتەرىنىڭ تۇراقسىز باياۋلاۋى كەزىندە ۇلتتىق بانك مونەتارلىق تالاپتاردى بارىنشا كۇشەيتۋدى جالعاستىرادى»، - دەلىنگەن ۇلتتىق بانك مالىمەتىندە.