گولوۆكين 2022-جىلعى ءبىرىنشى قارسىلاسىن تاڭدادى

نۇر-سۇلتان. قازاقپارات - بريتاندىق بوكسشى كىشى كريس يۋبەنك (31-2، 23 ك و) پەن وتانداسى ليام ۋيليامس (23-3-1، 18 ك و) جىل سوڭىنا دەيىن ءبىر-بىرىمەن كەزدەسەتىن مۇمكىندىك الادى، دەپ جازادى Sky Sports.

سودان سوڭ يۋبەنكتىڭ ورتا سالماقتاعى IBF جانە IBO بەلبەۋلەرىنىڭ يەگەرى قازاقستاندىق گەننادي گولوۆكينمەن (41-1-1، 36 KO) جولىعاتىن مۇمكىندىگى تۋادى.

يۋبەنكتىڭ ايتۋىنشا، جىل سوڭىنا دەيىن ول مىندەتتى تۇردە ۋيليامسپەن ايقاس وتكىزەدى. ءسويتىپ بۇرىننان كەلە جاتقان ءوزارا داۋعا نۇكتە قويادى.

«بۇل كەزدەسۋدى وتكىزگىمىز كەلەدى. ەكى بوكسشى دا بىرنەشە جىلدان بەرى جاۋلاسىپ ءجۇر. يۋبەنك ءۇشىن ماڭىزدى ايقاس بولماق. سەبەبى ول الداعى كەزدەسۋدە جەڭىسكە جەتسە، گولوۆكينمەن جۇدىرىقتاسۋعا مۇمكىندىك الادى»، - دەدى بوكسشىنىڭ پروموۋتەرى بەن شالوم.

يۋبەنكتىڭ باستى ماقساتى گولوۆكينمەن كەزدەسۋ. ول قازاقستاندىق بوكسشىنى جەڭىپ، چەمپيوندىق اتاققا قول جەتكىزۋگە نيەتتى ەكەن.

«كەلىسسوزدەر باستالدى. گولوۆكيننىڭ كومانداسىمەن بايلانىس ورناتىلدى. ولار دا يۋبەنكپەن كەزدەسكىسى كەلەدى. ءبىز بۇل كەزدەسۋدى مامىرعا جوسپارلاپ وتىرمىز»، - دەپ تۇيىندەدى پروموۋتەر.

ەسكە سالايىق، يۋبەنك گولوۆكينمەن 2016-جىلى كەزدەسۋى كەرەك ەدى. ءبىراق ول كەزدە بريتاندىق بوكسشىنىڭ كەسىرىنەن جەكپە-جەك وتپەي قالدى.

ەندى گولوۆكين شارشى الاڭعا جەلتوقسان ايىندا ورالادى دەپ كۇتىلۋدە. ول ورتا سالماقتا WBA ۇيىمىنىڭ «سۋپەرچەمپيونى» جاپونيالىق ريوتا مۋراتامەن (16-2، 13 ك و) كەزدەسەدى.