قازاقستان پرەزيدەنتى - جوعارعى باس قولباسشى «وتپانتاۋ-2021» اسكەري وقۋ- جاتتىعۋ جيىنىنا باردى
بۇل تۋرالى قازاقپارات اقوردانىڭ رەسمي سايتىنا سىلتەمە جاساپ حابارلايدى.
جوعارعى باس قولباسشى باس شتابتىڭ الدىڭعى شەپتەگى پۋنكتىن ارالاپ كورىپ، قورعانىس ءمينيسترىنىڭ، اۋە قورعانىسى، قۇرلىق اسكەرى، اسكەري- تەڭىز جانە دەسانت- شابۋىلداۋشى اسكەرلەر كۇشتەرى باسشىلارىنىڭ، سونداي- اق قاراعاندى وبلىسى اكىمىنىڭ بايانداماسىن تىڭدادى. قاسىم- جومارت توقايەۆ ارناۋلى ماقساتتاعى بولىمدەردىڭ دايىندىعىن تەكسەرىپ، قارۋ- جاراقتار مەن تەحنيكالاردىڭ زاماناۋي تۇرلەرىن كوردى، سونداي- اق اقتاۋداعى اسكەري گوسپيتال مەن ماڭعىستاۋ وبلىسىنداعى اۆياتسيالىق ينفراقۇرىلىمنىڭ قۇرىلىستارىنا قاتىستى پرەزەنتاتسيامەن تانىستى.
سودان كەيىن قاسىم- جومارت توقايەۆ بەلسەندى جۇرگىزىلگەن اسكەري ءادىس- تاسىلدەردىڭ كورسەتىلىمىن بيىك مىنبەردەن تاماشالادى. وقۋ- جاتتىعۋ جيىنىنىڭ ءتارتىبى بويىنشا ءارتۇرلى اسكەر توپتارىنىڭ شارتتى قارسىلاستارىنا قارسى جۇرگىزگەن اسكەري ءىس- قيمىلدارىنىڭ قازىرگى قارۋلى قاقتىعىستاردىڭ تاجىريبەسىنە نەگىزدەلگەن جاڭا ءادىس- تاسىلدەرى ءىس- جۇزىندە كورسەتىلدى.
اسكەر توپتارىنىڭ ءىس- قيمىلدارى بارىسىندا اۋەدەگى جانە جەردەگى بارلاۋ ارەكەتتەرى جۇزەگە اسىرىلدى. ونىڭ ناتيجەلەرى ۇشقىشسىز باسقارىلاتىن اپپاراتتار مەن ارالاس اۆياتسيا بولىمدەرىنە تۋرا سوققى جاسالاتىن نىسانداردى كورسەتىپ وتىرعان باسقارۋ پۋنكتىنە بەرىلىپ وتىردى. سونىمەن قاتار شارتتى قارسىلاستاردىڭ ۇشقىشسىز باسقارىلاتىن اپپاراتتارىنا قارسى كۇرەس ۇيىمداستىرىلىپ، كونترباتارەيالى سوعىستىڭ زاماناۋي ادىستەرى قولدانىلدى. وقۋ- جاتتىعۋ جيىنى بارىسىندا اسكەرلەردىڭ ۇتقىرلىق دەڭگەيىنىڭ جوعارى بولۋىن قامتاماسىز ەتۋگە نازار اۋدارىلدى.
بۇدان بولەك پرەزيدەنتكە قارۋلى كۇشتەردىڭ، ۆەدومستۆوارالىق بولىمدەردىڭ، سونداي- اق ەلىمىزدىڭ ءارتۇرلى وڭىرلەرىندەگى جەرگىلىكتى اتقارۋشى ورگاندار مەن ورتالىق مەملەكەتتىك ورگانداردىڭ اۋماقتىق بولىمشەلەرىنىڭ جۇرگىزگەن ءىس- قيمىلدارى ونلاين رەجيمدە كورسەتىلدى.
اتاپ ايتقاندا، كاسپي تەڭىزى ايدىنىندا اسكەري تەڭىز كۇشتەرىنىڭ اۆياتسيا مەن ارنايى وپەراتسيالار كۇشتەرىنىڭ قولداۋىمەن ەلىمىزدىڭ ەكونوميكالىق نىساندارىن قورعاۋعا باعىتتالعان ءىس- قيمىلدارى جۇرگىزىلدى. وسىنداي اسكەري وقۋ- جاتتىعۋ جيىندارى قاراعاندى وبلىسىنداعى «سارىشاعان»، «سپاسسك» جانە الماتى وبلىسىنداعى «كوكتال» پوليگوندارىندا ءوتتى.
ءادىس- تاسىلدەر كورسەتىلىمى اياقتالعاننان كەيىن اسكەري قىزمەتشىلەر الدىندا ءسوز سويلەگەن جوعارعى باس قولباسشى «ويماشا» پوليگونىندا وتكىزىلگەن وقۋ- جاتتىعۋ جيىنىنىڭ ماڭىزى زور ەكەنىن ايتتى.
- بۇل تاريحي مەكەن - ەلدىك پەن ەرلىكتىڭ، بىرلىك پەن تۇتاستىقتىڭ سيمۆولى. ەل شەتىنە جاۋ تيگەندە بابالارىمىز وسى تاۋدىڭ باسىنا «ۇران وتىن» جاققان. جاۋاپتى ساتتە ءبىر تۋدىڭ استىنا جينالعان. سوندىقتان جۇرتىمىز ونى «بىرلىكتىڭ وتى» دەپ اتاعان. ەرلەرىمىز تۋعان جەردى قورعاۋ ءۇشىن جورىققا وتپانتاۋدىڭ باۋىرىنان اتتانعان. وسى جەردە ۇلت تاعدىرىن شەشەتىن ماڭىزدى جيىندار وتكەن. بۇل يگى ءداستۇر قازىرگى كۇنگە دەيىن جەتىپ وتىر. ءبىز باتىرلارىمىزدىڭ رۋحىنا تاعزىم ەتەمىز. سونىمەن بىرگە ءداستۇر ساباقتاستىعىن ساقتايمىز. ەڭ باستىسى، بايتاق دالانى ۇرپاعىنا ميراس ەتكەن بابالار اماناتىنا ادال بولىپ، وتانىمىزدى قورعايمىز، - دەدى مەملەكەت باسشىسى.
پرەزيدەنت اسكەري وقۋ- جاتتىعۋ جيىندارىندا، سونىڭ ىشىندە حالىقارالىق دەڭگەيدە تۇراقتى تۇردە جاقسى ناتيجە كورسەتىپ كەلە جاتقان ەلىمىزدىڭ قارۋلى كۇشتەرىنىڭ اسكەري دايىندىعىنىڭ دەڭگەيى جوعارى ەكەنىن اتاپ ءوتتى. سونداي- اق اسكەرىمىزدىڭ ناقتى سوعىس جاعدايىندا دا بيىكتەن كورىنەتىنىنە سەنىم ءبىلدىردى.
- ارميادا ۇنەمى جاڭعىرۋ ۇدەرىسى جۇرگىزىلەدى. بۇل زاماناۋي سىن- قاتەرلەر مەن قاۋىپتەرگە دايىندىعىمىزدى قامتاماسىز ەتەدى. ارنايى وپەراتسيالار جۇرگىزەتىن كۇشتەر، بارلاۋ بولىمدەرى مەن ارناۋلى ماقساتتاعى بولىمشەلەر قارقىندى دامىپ كەلەدى. ديۆەرسيالىق ارەكەتتەرگە قارسى ءىس- قيمىلدار پىسىقتالادى. تۋرا سوققى جاسايتىن قارۋلار مەن ۇشقىشسىز باسقارىلاتىن قۇرالدار كەڭىنەن قولدانىلا باستادى، - دەدى پرەزيدەنت.
مەملەكەت باسشىسى اسكەري قىزمەتشىلەر الدىندا سويلەگەن سوزىندە وڭىردەگى اسكەري- ساياسي احۋالدىڭ كۇردەلەنۋ جاعدايىندا وتكەن بۇگىنگى كەشەندى وقۋ- جاتتىعۋ جيىنى كۇشتىك قۇرىلىمدار مەن جەرگىلىكتى اتقارۋشى بيلىكتىڭ داعدارىس جاعدايىن اۋىزدىقتاۋعا ازىرلىگىن كورسەتكەنىن جەتكىزدى. جوعارعى باس قولباسشى وقۋ- جاتتىعۋ جيىندارى ەلىمىزدىڭ ءارتۇرلى وڭىرىندە ورنالاسقان جەتى وقۋ- جاتتىعۋ پوليگونىندا جانە كاسپي ايدىنىندا وتكەنىن اتاپ ءوتتى. جالپى وقۋ- جاتتىعۋ جيىندارى شىعىستان باتىسقا قاراي ءۇش مىڭ شاقىرىم اۋماقتى قامتىدى.
- جەكە قۇرام مەن تەحنيكانى ءوز جۇرىستەرىمەن، تەمىرجول جانە اۋە قاتىناستارى ارقىلى جىلجىتۋ جۇمىستارى پىسىقتالدى. بۇل قارۋلى كۇشتەردىڭ ستراتەگيالىق ۇتقىرلىعىن، قاۋىپ توندىرەتىن نەگىزگى باعىتتار بويىنشا اسكەري توپتاردى جەدەل قۇرۋ مۇمكىندىگىن كورسەتتى. شتابتاردىڭ شۇعىل جاعدايلار كەزىندەگى ۇيلەسىمدى جۇمىسىن، جوعارى تەحنولوگيالى قارۋلار مەن اسكەري ءىس- قيمىلداردى جوسپارلاۋ ادىستەمەلەرىنىڭ قولدانىلۋىن كوردىك. اكىمدىكتەردىڭ دە دايىندىق دەڭگەيىنىڭ جوعارىلاعانىنا كۋا بولدىق. قازىرگىدەي «سترەسس- تەستىلەۋ» كەزىندە ولاردىڭ ءرولى اسكەري قۇرامداردان كەم تۇسپەيدى، - دەدى قاسىم- جومارت توقايەۆ.
پرەزيدەنت ارميانىڭ مەملەكەت پەن قوعام تاراپىنان ءجىتى باقىلاناتىن نىسان ەكەنىن اتاپ ءوتتى. سونداي- اق مەملەكەت باسشىسى اسكەردى زاماناۋي قارۋ- جاراقپەن جانە تەحنيكامەن ودان ءارى جابدىقتاۋعا نەگىزدەلگەن قارۋلى كۇشتەردى جانە باسقا دا اسكەرلەر مەن اسكەري قۇرامداردى دامىتۋ تۇجىرىمداماسىنىڭ بەكىتىلگەنىن ەسكە سالدى.
- ولاردىڭ قاتارىندا اۋە شابۋىلىنا قارسى قورعانىس، ۇشقىشسىز باسقارىلاتىن ۇشۋ اپپاراتتارى، بارلاۋ جانە راديوەلەكتروندى كۇرەس قۇرالدارى بار. مايدان، اسكەري جانە اسكەري- كولىك اۆياتسيا پاركىن جاڭارتۋ جۇمىستارى جالعاسادى. اسكەرىمىز شەتەلدىك جانە وتاندىق وندىرىستە جاسالعان تۋرا سوققى جاسايتىن زىمىران كەشەندەرىمەن جابدىقتالادى. جالپى قارۋلى كۇشتەردىڭ تەحنيكالىق الەۋەتى قازاقستاندىق ارميانىڭ جاڭا كەلبەتىن كورسەتەدى، - دەدى مەملەكەت باسشىسى.
جوعارعى باس قولباسشى اسكەري قىزمەتشىلەرگە كەشەندى الەۋمەتتىك قولداۋ كورسەتۋ ماسەلەلەرىنە دە توقتالدى.
- قارجىلاندىرۋ ماسەلەسى كەزەڭ- كەزەڭىمەن ارتىپ كەلەدى. بيىلدان باستاپ اسكەري قىزمەتشىلەردىڭ لاۋازىمدىق ەڭبەكاقىلارى 35 پايىزعا ءوستى. الداعى ەكى جىلدا ورتاشا ەسەپپەن 60 پايىزعا جوعارىلايدى. بارلىق ساناتتاعى اسكەري قىزمەتشىلەر ءۇشىن تۇرعىن ءۇي ماسەلەسى زاڭنامالىق تۇرعىدان شەشىلگەن. ت م د- نىڭ باسقا ەلدەرىنە قاراعاندا قازاقستاندىق اسكەردىڭ الەۋمەتتىك توپتاماسى - باسەكەگە قابىلەتتى. اسكەري قىزمەتشىلەردى الەۋمەتتىك قورعاۋ ماسەلەسى ءاردايىم مەملەكەت باسىمدىق بەرەتىن سالالاردىڭ قاتارىندا بولادى. كۇشتى اسكەر - قۋاتتى ەگەمەن قازاقستاننىڭ كەپىلى، - دەدى پرەزيدەنت.
قاسىم- جومارت توقايەۆ ءسوزىنىڭ سوڭىندا ءمىنسىز قىزمەتتەرى ءۇشىن اسكەري قىزمەتشىلەرگە العىس ايتىپ، ەلىمىزدىڭ قاۋىپسىزدىگىن بەرىك قورعايتىندارىنا سەنىم ءبىلدىردى. «وتپانتاۋ-2021» جەدەل- ستراتەگيالىق اسكەري- شتابتىڭ وقۋ- جاتتىعۋ جيىنى اسكەرىمىزدىڭ ازىرلىگىن توسىننان تەكسەرۋدىڭ سوڭعى كەزەڭى بولدى. قارۋلى كۇشتەردەگى وقۋ- جاتتىعۋ جيىندارى بيىلعى قىركۇيەك ايىنىڭ باسىنان بەرى جۇرگىزىلىپ كەلەدى. تەكسەرىسكە 9 مىڭعا جۋىق اسكەري قىزمەتشى قاتىسىپ، 3 مىڭنان استام قارۋ- جاراق پەن اسكەري تەحنيكا، ونىڭ ىشىندە 66 ۇشۋ اپپاراتى مەن 8 كەمە جۇمىلدىرىلدى.
