مادەنيەت سالاسى قىزمەتكەرلەرى اراسىندا «رۋحاني قازىنا - 2021» فەستيۆالى باستالدى
مادەنيەت جانە ونەر سالاسى قىزمەتكەرلەرىنىڭ كاسىبي مەرەكەسىنە وراي ۇيىمداستىرىلعان فەستيۆالدىڭ رەسپۋبليكالىق دەڭگەيدەگى قازىلار القاسىنىڭ وتىرىسى 12-14-مامىر ارالىعىندا ونلين كورسەتىلىم ارقىلى جۇرەدى. فەستيۆالدىڭ سالتاناتتى ماراپاتتاۋ ءراسىمى 18-21-مامىر ارالىعىنا جوسپارلانىپ وتىر.
وسى ارالىقتا كوكشەتاۋ قالاسىندا شەتەلدىك ساراپشىلاردىڭ قاتىسۋىمەن شەبەرلىك ساعاتتارى وتەدى. فەستيۆالدىڭ اشىلۋ سالتاناتىنا مادەنيەت جانە سپورت مينيسترلىگىنىڭ اتىنان قاتىسقان مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆا جىل وتكەن سايىن جۇمىسىن رەسپۋبليكا دەڭگەيىندە كورسەتكىسى كەلەتىن ۇيىم مەن قىزمەتكەرلەر سانى ارتىپ كەلە جاتقانىن اتاپ ءوتتى.
«بۇگىندە بايقاۋعا ەلىمىزدىڭ 15 وڭىرىنەن كىتاپحانا، مۋزەي جانە مادەني- دەمالىس قىزمەتى بويىنشا 300د ەن استام ءوتىنىش كەلىپ ءتۇستى. ال ەڭ العاش ۇيىمداستىرعان كەزدە قاتىسۋشىلار سانى 100 گە جەتپەيتىن ەدى. جىل وتكەن سايىن اۋىل، اۋدان، قالاداعى مادەنيەت وشاقتارىنىڭ قىزمەتىن جانداندىرۋعا باعىتتالعان بايقاۋ كەڭىنەن تانىلىپ كەلەدى. وسى فەستيۆالدە ۇزدىك شىققان ۇيىم 1 ميلليون تەڭگە، توپ جارعان قىزمەتكەر 500 مىڭ تەڭگە سىياقى الادى. بيىل فەستيۆالدىڭ مامىر ايىندا وتكىزىلۋىنىڭ وزىندىك سەبەبى بار. ۇزدىكتەردى ماراپاتتاۋ ءراسىمى باستالاتىن 18-مامىر - حالىقارالىق مۋزەي كۇنىنە، 21 - مامىر ەلىمىزدىڭ مادەنيەت جانە ونەر سالاسى قىزمەتكەرلەرىنىڭ كۇنىنە ورايلاستىرىلدى»، - دەدى كۇمىس سەيىتوۆا.
رەسپۋبليكالىق «رۋحاني قازىنا - 2021» بايقاۋىنىڭ اياسىندا وبلىستىق، اۋداندىق، قالالىق دەڭگەيدەگى ۇزدىك مەملەكەتتىك مۋزەي، ۇزدىك كىتاپحانا، ۇزدىك مەملەكەتتىك مادەني ويىن- ساۋىق ۇيىمى مەن مادەنيەت ۇيىمدارىنىڭ ۇزدىك قىزمەتكەرلەرى ىرىكتەلىپ، ماراپاتتالادى.