اقمولا وبلىسىندا «كوكتەم - 2021» وقۋ-جاتتىعۋى ءوتىپ جاتىر
وبلىستىق ت ج د باسپا ءسوز قىزمەتىنىڭ مالىمەتىنشە، شارا ماقساتى - كوكتەمگى سۋ تاسقىنى سالدارىنان تۋىندايتىن توتەنشە جاعدايلاردىڭ زاردابىن جويۋ كەزىندەگى ءىس-قيمىل جانە ازاماتتىق قورعانىس جۇيەسىنىڭ دايىندىعىن انىقتاۋ.
وعان توتەنشە جاعدايلار دەپارتامەنتىنىڭ اۋماقتىق بولىمشەلەرى جانە ازاماتتىق قورعانىس قۇرىلىمدارى، وبلىستىق ازاماتتىق قورعاۋ قىزمەتتەرى، ق ر ۇلتتىق ۇلانىنىڭ 5510 اسكەري ءبولىمى، جەرگىلىكتى اتقارۋشى ورگاندار، كاسىپورىندار مەن ۇيىمداردىڭ وكىلدەرى تارتىلدى.
وبلىستىق وقۋ-جاتتىعۋدى وتكىزۋ ورنى اتباسار جانە سەلينوگراد اۋداندارى مەن كوكشەتاۋ قالاسى بولىپ ايقىندالدى.
«ارنايى-تاكتيكالىق جاتتىعۋ جۇمىستارى بارىسىندا كوكتەم ايلارىندا ورىن الاتىن سۋ تاسقىنى ءتارىزدى توتەنشە جاعدايلاردى جويۋ كەزىندە باسقارما ورگاندارى مەن مەملەكەتتىك ازاماتتىق قورعانىس كۇشتەرىنىڭ دايىندىعى تەكسەرىلىپ، الگوريتمى پىسىقتالادى»، - دەدى ۆەدومستۆودان.