ەلىمىزدە 2021 -جىلى بەسىنشى بۋىن ينتەرنەت بايلانىسى قولدانىلا باستايدى

نۇر-سۇلتان. قازاقپارات -  قازاقستانداندا 5G ينتەرنەت بايلانىسىنىڭ مۇمكىندىكتەرى 2021 -جىلى قولدانىلا باستايدى، دەپ حابارلايدى «حابار 24» ءتىلشىسى.

الماتىدا «قازاق تەلەكوم» وتاندىق بايلانىس وپەراتورى مەن شۆەتسيانىڭ Erіcsson كومپانياسى موبيلدى بايلانىستىڭ جاڭا بۋىنىنىڭ الەۋەتىن تانىستىردى. قازىرگىدەي سيفرلىق جۇيەگە بەيىمدەلىپ جاتقان تۇستا، ينتەرنەتتىڭ جىلدامدىعىنان بولەك، ونىڭ ىركىلىسسىز جۇمىس ىستەگەنى ماڭىزدى. «مۇنداي مۇمكىندىكتى تەك 5G بەرە الادى»، - دەيدى ماماندار.

 نۇرلان مەيىرمانوۆ، «قازاق تەلەكوم» ا ق باس يننوۆاتسيالىق ديرەكتورى:

- 5G- ءدىڭ نەگىزگى تۇتىنۋشىسى - مەملەكەت. بايلانىستىڭ بۇل ءتۇرى جاڭا تەحنولوگياعا كوشۋدەگى مۇمكىندىكتى ەكى ەسە ارتتىرادى. جەكە تۇتىنۋشىلاردىڭ سۇرانىسىن 4G دە قاناعاتتاندىرا الادى. ال وندىرىستە قۋاتتى ينتەرنەت قاجەت.

 5G تەحنولوگياسىنىڭ مۇمكىندىكتەرى Erіcsson كومپانياسىنىڭ زاماناۋي قۇرىلعىلارىنىڭ كومەگىمەن تانىستىرىلدى. ماسەلەن، جاڭا جۇيەگە قوسىلعان باعدارشام، جەدەل جاردەم مەن ءورت ءسوندىرۋ كولىگىن جول قيىلىسىنان كىدىرىسسىز وتكىزە الادى. سونداي- اق 5G- مەن ۇزاق جولعا شىعاتىن كولىكتەردى جۇرگىزۋشىسىز باسقارۋعا بولادى.

 ايدىن ابجانبەكوۆ، Ericsson كومپانياسىنىڭ قازاقستانداعى باس ديرەكتورى:

- ءبىز بۇگىن بەسىنشى بۋىن تەحنولوگياسىنىڭ ەڭ جوعارى - سەكۋندىنا 15 گيگابايت جىلدامدىعىن كورسەتتىك. ياعني بىرنەشە جىل بۇرىن بۇل جىلدامدىق 300 مىڭ تۇرعىنى بار قالاعا كابەل ارقىلى قولجەتىمدى بولسا، بۇگىن ءبىز بۇل جىلدامدىقتى ءبىر ابونەنتكە عانا كورسەتتىك.

جاڭا موبيلدى بايلانىستىڭ شىعىنى دا از ەمەس. مىناداي بازالىق ستانسا 50 مەتر اۋماقتى عانا قامتيدى. دەگەنمەن وتكىزۋ جىلدامدىعى وتە جوعارى. سوندىقتان باسەكەلى نارىقتا بايلانىس وپەراتورلارى جاڭا جۇيەنى يگەرۋگە مۇددەلى. ال ەلىمىزدە 5G تەحنولوگياسى 2021 -جىلى قولدانىلا باستايدى.

www.24.kz