قازاقستاندا 2021- جىلعا دەيىن جولداردىڭ 90 پايىزى جاڭارتىلادى

استانا. قازاقپارات - ەلوردادا «بىرلىككە بارار جولدا» اتتى جىبەك جولىنا قاتىسۋشى ەلدەردىڭ حالىقارالىق فورۋمى باستالدى.

 بۇل فورۋمدى ەلىمىزدىڭ مادەنيەت جانە سپورت مينيسترلىگى تاپسىرىسىمەن Kazakh Tourism كومپانياسى ۇيىمداستىرىپ وتىر.

 تۋريزم سالاسىنىڭ ماماندارى قىزمەت كورسەتۋ ستاندارتتارىن جەتىلدىرۋ، تۋريزم ماركەتينگىن ءتيىمدى ەتۋ، عالامتورداعى قىزمەتتەردى ناسيحاتتاۋ، حالىقارالىق اۋە تاسىمالدارىن دامىتۋ، كولىك سالاسىنىڭ ينۆەستيتسيالىق الەۋەتىن ارتتىرۋ مەن جىبەك جولى ەلدەرىنىڭ ءوزارا سەرىكتەستىگىنىڭ بولاشاعى تاقىرىپتارىن قىزۋ تالقىلاپ جاتىر.

بۇگىن ەلوردا تورىندە يسپانيا، تۇركيا، قىتاي،  ۇلى بريتانيا، گەرمانيا، لاتۆيا، رۋمىنيا، رەسەي، وزبەكستان مەن قازاقستانداعى تۋريزم سالاسىنىڭ ۇزدىك ساراپشىلارى جينالىپ وتىر. كەشەدەن بەرى ولار وسى باعىتتاعى ورتاق ماسەلەلەردى تالقىعا سالىپ جاتىر. بۇگىنگى كۇننىڭ تاقىرىبى -  كولىك جانە اۋە جولدارىمەن قاتىناۋ. وسىعان وراي ينۆەستيتسيالار جانە دامۋ ءمينيسترىنىڭ ورىنباسارى قايىربەك وسكەنبايەۆ ەلىمىزدە وسى باعىتتاردىڭ دامۋى جايىندا باياندادى.

ۆيتسە- ءمينيستردىڭ ايتۋىنشا، تەمىرجولداعى 60 باعىتتى دامىتۋ جوسپاردا بار. 2021 -جىلعا دەيىن ەل جولدارىنىڭ 90 پايىزى جاڭارتىلادى. سونداي- اق ۆاگوندار پاركىن جاڭارتۋ باعدارلاماسى دا قابىلداندى.

 سول سەبەپتى «ىشكى تۋريزمدى دامىتۋعا قاۋقارىمىز بار» دەيدى ساراپشىلار. سونىمەن قاتار بۇگىن ەلىمىزدە اۋە قاتىناستارىن دامىتۋ جايىندا دا ءسوز قوزعالدى. بىلتىر وتاندىق اۋە كومپانيالارى 7,4 ميلليون جولاۋشىنى تاسىمالدادى. ال ترانزيتتىك جولاۋشىلار سانى 30 پايىزعا ارتتى. قازاقستان 38 ەلمەن ۇكىمەتتىك كەلىسىم جاساستى. قازىر بىزدە 98 حالىقارالىق باعىت بار. ولاردىڭ 56-سى ت م د ەلدەرى، 12- ءسى ەۋرووداق، ال 15- ءسى وڭتۇستىك- شىعىس ازيا ەلدەرىنە ۇشادى. فرانكفۋرت، ىستامبۇل، تەگەران سىندى ءىرى 22 باعىت رەتتەلگەن. بولاشاقتا بۇل تىزىمگە توكيو مەن نيۋ- يورك قالالارى دا قوسىلادى دەگەن جوسپار بار.

ىشكى رەيستەردى دە دامىتۋعا كوپ كۇش سالىنىپ جاتىر. 2023 -جىلعا دەيىن سۋبسيديالىق رەيستەردى ىسكە قوسۋ كوزدەلگەن. ەلىمىزدىڭ باستى 10 باعىتى بويىنشا رەيستەردى رەتتەۋ تۋرالى تاپسىرما بار. مامانداردىڭ ايتۋىنشا، حالىق ءبىرقاتار تۋريستىك ايماقتارعا جەتە الماي وتىر. سۋبسيديالىق رەيستەر بويىنشا بۇل پروبلەمانى شەشۋگە سەپتىگىن تيگىزۋى كەرەك. سونداي- اق الداعى ۋاقىتتا چەحيادا شىعارىلعان 20 ۇشاق ساتىپ الۋ جوسپارلانعان. ولاردىڭ ەكەۋى جىل سوڭىنا دەيىن ەلگە جەتكىزىلەدى. بۇكىل رەسپۋبليكا بويىنشا 16 ايەرودروم سالىنادى دەپ كۇتىلىپ وتىر.

www.24.kz