قاراعاندى وبلىسىندا 2021-جىلعا دەيىن 32 كوپقاباتتى تۇرعىن ءۇي سالىنادى
قاراعاندى وبلىسىنىڭ اكىمى ەرلان قوشانوۆ ۇكىمەتتىڭ كەڭەيتىلگەن وتىرىسىندا پرەزيدەنتتىڭ بەرگەن تاپسىرمالارى جايلى مالىمدەدى. ءوڭىر باسشىسىنىڭ ايتۋىنشا، تاپسىرمالار ءبىلىم، دەنساۋلىق، تكش، سونىمەن قاتار ءوڭىردىڭ ەكونوميكالىق دامۋ سالالارىنا قاتىستى بولدى.
قالا اكىمى نۇرلان اۋباكىروۆكە ايماق باسشىسى ەرلان قوشانوۆ قاراعاندىداعى ورام ارالىق جانە اۋلالاردىڭ اراسىنداعى جولداردى جوندەۋدى تاپسىردى. بۇعان قوسا، وبلىستا نازاربايەۆ زياتكەرلىك مەكتەپتەرىنىڭ ستاندارتتارى بويىنشا كوپتەگەن مەكتەپتەردى جابدىقتاۋ كەرەكتىگى ايتىلدى.
بۇل تاپسىرما ءبىلىم باسقارماسىنىڭ جەتەكشىسى ەسەنعازى يمانعاليەۆكە بەرىلدى. سونىمەن قاتار شالعايداعى اۋدانداردىڭ وقۋشىلارىن مەكتەپ اۆتوبۋسىمەن قامتاماسىز ەتۋ كەرەكتىگى تىلگە تيەك ەتىلدى.
وبلىس اۋداندارىندا جىلجىمالى مەديتسينالىق باقىلاۋ بەكەتتەرى پايدا بولۋى ءتيىس. اۋرۋحانالار مەن ەمحانالاردا قازىرگى زامانعى جابدىقتار ورناتۋ قاجەت. بۇل مىندەتتەمەنى ەرلان قوشانوۆ دەنساۋلىق ساقتاۋ باسقارماسىنىڭ جەتەكشىسى ەرجان نۇرلىبايەۆقا ارتتى.
بيلىك تاراپىنان ەرەكشە نازار قاراعاندىلىقتاردىڭ تۇرمىس ساپاسىن جاقسارتۋعا اۋدارىلماق.
«پرەزيدەنت اتاپ وتكەندەي، مەملەكەتتىڭ تيىمدىلىگى، ءبىرىنشى كەزەكتە، حالىقتىڭ تابىستارى مەن تۇرمىستىق جاعدايىمەن تىكەلەي بايلانىستى جانە وسى كورسەتكىشتەر بويىنشا ءبىزدىڭ دە جۇمىسىمىز باعالانادى»، - دەدى ول.
ەرلان قوشانوۆ سونىمەن قاتار مەملەكەت باسشىسىنىڭ جولداۋى اياسىندا 32 مىڭ جۇمىس بەرۋشى 220 مىڭنان اسا جۇمىسكەرلەردىڭ جالاقىسىن كوتەرگەنىن اتاپ ءوتتى. ال كوممۋنالدىق قىزمەت تاريفتەرى %5-11 تومەندەگەن. وبلىس اكىمى ازىق-تۇلىك تاۋارلارى مەن كوممۋنالدىق قىزمەت باعالارىن تۇراقتاندىرۋ بويىنشا جۇمىستاردى جالعاستىرۋدى تاپسىردى.
سونىمەن قاتار باسىم باعىتتار قاتارىندا ازىق-تۇلىك ونىمدەرىنىڭ يمپورت الماستىرۋى مەن ايماقتاعى ينۆەستيتسيالىق جاعدايدى جاقسارتۋ بولىپ قالا بەرەدى.
2019-جىلى وڭىرگە 500 ميلليارد تەڭگەدەن استام ينۆەستيا جۇمىلدىرىلۋى ءتيىس. بيىلعى جىلى «7-20-25» باعدارلاماسىن ورىنداۋ شەڭبەرىندە وبلىستىق بيۋجەتتەن تۇرعىن ءۇي سەرتيفيكاتتارىن قارجىلاندىرۋعا ءبىر ميلليارد تەڭگە بولىنگەن. 2019-2021-جىلدارى 32 كوپقاباتتى تۇرعىن ۇيلەر سالىنادى دەپ جوسپارلانۋدا.
وبلىستاعى ستۋدەنتتەر ءۇشىن جالپى ەسەپتەگەندە 1500 ورىنعا شاقتالعان جاتاقحانالار سالىنادى. بۇل ماقساتتا جەر تەلىمدەرى ءبولىنىپ، جوبالىق سمەتالىق قۇجاتتار ازىرلەنگەن. ەرلان قوشانوۆ قول استىنداعى قىزمەتكەرلەرگە اتالمىش جوسپارلاردىڭ ورىندالۋىن قاداعالاۋدى تاپسىردى.