توكيو-2020: زاكير سافيۋللين جارتىلاي فينالدان تىس قالدى
قازاقستاندىق سپورتشى بۇگىن شيرەك فينالدا اۋستراليالىق حارريسون گارسايدپەن كەزدەستى. ەكەۋىنىڭ جەكپە- جەگىندە بەس تورەشىنىڭ ۇشەۋى زاكيردىڭ باسىم ەكەندىگىن كورسەتتى. ەكىنشى راۋندتا بۇل كەرىسىنشە بولدى. وسىلايشا ءۇشىنشى راۋند ەكەۋىنىڭ تارتىستى جەكپە- جەگىمەن جالعاستى. ناتيجەسىندە تورەشى اۋستراليالىق بوكسشىنىڭ قولىن كوتەردى.
24 جاستاعى حارريسون گارسايد وليمپيادادا ءتاپ- ءتاۋىر ناتيجەگە قول جەتكىزىپ كەلەدى. العاشقى ەكى جەكپە- جەگىندە پاپۋا- جاڭا گۆينەيا ەلىنەن كەلگەن دجون ۋمە مەن ناميبيالىق يوناس يوناستى 5:0 ەسەبىمەن تىزە بۇكتىردى.
وليمپيادادا زاكير ءبىرىنشى ىرىكتەۋ كەزەڭىندە پەرۋلىك لەودان پەزونى 5:0 ەسەبىمەن جەڭسە، ودان كەيىن جاپونيالىق دايسۋكە ناريماتسۋ دەنساۋلىق جاعدايىنا بايلانىستى شارشى الاڭعا شىعۋدان باس تارتتى.
ەسكە سالساق، بيىلعى وليمپياداعا بوكستان ەرلەر قۇراماسىنان 8 سپورتشى باردى. ولاردىڭ اراسىنان زاكيردەن وزگە ساكەن بيبوسىنوۆ (52 كەلى)، قامشىبەك قوڭقابايەۆ (91 كەلىدەن جوعارى) جارتىلاي فينالعا شىقتى.
اۆتور: ءادىلجان ۇمبەت