توكيو-2020: ەلەنا رىباكينا شيرەك فينالعا جولداما الدى

توكيو. قازاقپارات - توكيو وليمپياداسىندا سىنعا ءتۇسىپ جاتقان تەننيسشى ەلەنا رىباكينا شيرەك فينالعا جولداما الدى، دەپ حابارلايدى قازاقپارات.

قازاقستاندىق تەننيسشى 1/8 فينالدا حورۆاتيالىق دوننا ۆەكيچپەن شەبەرلىك بايقاستى. قارسىلاسىن ەكى سەتتە 7:6، 6:4 ەسەبىمەن جەڭىپ، شيرەك فينالعا شىقتى. ەندى ول يسپانيالىق گاربينە مۋگۋرۋسومەن تايتالاسقا تۇسەدى.

ايتا كەتەيىك، العاشقى كەزدەسۋلەرىندە ول اۆستراليالىق سامانتا ستوسۋر (6:4، 6:2) جانە شۆەتسيالىق رەبەككا پەتەرسون (6:2، 6:3) سىندى قارسىلاستارىن قاپى قالدىرىپ كەتتى. تەننيستەن قازاقستان ايەلدەر قۇراماسىندا بۇعان دەيىن زارينا دياس، ياروسلاۆا شۆەدوۆا جانە يۋليا پۋتينتسيەۆا جارىس جولىنان شىعىپ قالدى. سونداي- اق، بۇگىن ميحايل كۋكۋشكين ەرلەر اراسىندا 1/8 فينالدا بەلارۋستىك يليا يۆاشكوعا ەسە جىبەردى.

بيىل ءدۇبىرلى دودادا 33 سپورت تۇرىنەن 339 مەدال جيىنتىعى ساراپقا سالىنادى. ايتۋلى الامانعا جەر بەتىندەگى 206 مەملەكەتتەن 11 مىڭنان استام سپورتشى قاتىسۋدا. قازاقستاندىق 97 سپورتشى كۇنشىعىس ەلىندە سپورتتىڭ 28 تۇرىنەن باق سىنايدى.