توكيو 2020: بوسقىندار قۇراماسىنداعى سپورتشىلاردىڭ وقيعاسى
ءبىراق بۇل جولى توكيو تورىنە كەلگەن قاشقىن سپورتشىلاردىڭ سانى ءۇش ەسە كوپ. بوسقىندار قۇراماسىندا وتانىنان ساياسي، الەۋمەتتىك نە وزگە سەبەپتەرمەن قاشۋعا ءماجبۇر بولعان سپورتشىلار قوسىلعان. مىسالى، يران ەلىنىڭ دزيۋدوشىسى دجاۆاد مادجۋب ناسىلدىك قىسىمعا ۇشىراعان. ول 2012 -جىلى وليمپيادا ويىندارىنا جولداما العان. الايدا ءبىرىنشى اينالىمدا يزرايل سپورتشىسى اريكا زەيەۆيگە قارسى تۇسكەندىكتەن جارىسقا بارمادى. بۇرىننان كەلە جاتقان ەكى ەل اراسىنداعى ساياسي جانە ءدىني قاقتىعىستاردىڭ سالدارىنان يران سپورتشىلارىنا يزرايل تۇرعىندارىمەن جارىسۋعا تىيىم سالىنعان.
سپورت ءمينيسترى مۇحاممەد ءابباسيدىڭ ايتۋىنشا، «سيونيستەرمەن جارىسپاۋ - يران حالقى مەن سپورتشىلارىنىڭ ماقتان تۇتاتىن سەبەبى جانە قۇندىلىعىنىڭ ءبىرى». وسىنىڭ سالدارىنان دجاۆادانى ەلىنەن شىعارمادى. بۇل ءبىر مارتە بولعان جاعداي ەمەس، بىرنەشە رەت قايتالانعان سوڭ سپورتشىنىڭ شىدامى تاۋىسىلىپ، كاناداعا قونىس اۋداردى.
اۋعان قىزى نيگارا شاحيننىڭ وقيعاسى مۇلدەم ەرەكشە. ول دزيۋدومەن شۇعىلدانۋ ءۇشىن ەلىنەن كەتكەن. اۋعانستاندا قىزدارعا كەز كەلگەن دەنە مۇشەلەرى جاناساتىن سپورت تۇرلەرىمەن اينالىسۋعا تىيىم سالىنعان. نيگارا شاحين تاۋەكەلگە بەل بۋىپ، رەسەيگە قونىس اۋدارعان.
يۋسرا مارديني ەسىمدى سيريالىق سپورتشى ءولىم مەن ءومىر اراسىندا ارپالىسقان. سيرياداعى توقتاۋسىز سوعىستان قاشقان ول اپكەسىمەن گرەكياعا جول تارتادى. جەتى ادامعا ارنالعان قايىققا 20 جولاۋشى وتىرعان سوڭ جارتى جولدا سۋعا باتا باستاعان. سونشا ادامنىڭ ىشىندە تەك يۋسرا مەن اپكەسى عانا ءجۇزۋدى بىلگەن. سوندىقتان ولار قايىقتى ءۇش ساعات بويى جاعاعا يتەرگەن.
كىشكەنە عانا ەريترەيا ەلىنىڭ مارافونشىسى تاحلوۆيني گابريەسوس ومىرىنە قاۋىپ تونگەندىكتەن تەز ارادا باسقا ەلگە قاشقان. ول كەزدە 12 جاستا بولعان ءبۇلدىرشىن سۋدان مەن مىسىردىڭ ءشولىن باسىپ ءوتىپ، يزرايلگە جەتكەن.
بوسقىندار قۇراماسىنداعى ءار سپورتشىنىڭ ايتار وقيعاسى بار. ءارقايسىسىنىڭ ءومىر جولى ەرەكشە. باستاپقىدا كوبى قارسى كەلگەن بوسقىندار قۇراماسى قازىر وليمپيادا ويىندارىنىڭ اجىراماس بولىگىنە اينالىپ كەلە جاتىر. ءتىپتى، قۇرامانىڭ ءانۇرانى مەن تۋى بار.
www.24.kz