توكيو-2020: قازاقستان قورجىنى تاعى ءبىر جولدامامەن تولىقتى

نۇر-سۇلتان. قازاقپارات - بۇگىن قازاقستان قۇراماسىنىڭ قورجىنى توكيو وليمپياداسىنا تاعى ءبىر جولدامامەن تولىعىپ، 97 گە جەتتى، دەپ حابارلايدى قازاقپارات ءتىلشىسى.

تەننيستەن قازاقستان قۇراماسىنىڭ وكىلى زارينا دياس وليمپيادا ليتسەنزياسىنىڭ يەگەرى بولدى. بۇل حالىقارالىق تەننيس فەدەراتسياسى قالعان كۆوتالاردى قايتا ءبولۋدى جۇزەگە اسىرعاننان كەيىن بەلگىلى بولدى.

سپورتشىنىڭ ITF ليتسەنزياسىن قازاقستان ۇلتتىق وليمپيادالىق كوميتەتى راستادى.

ەندى ول توكيودا جەكەلەي سىندا ونەر كورسەتەدى. وسىلايشا، التى قازاقستاندىق جەكەلەي سىندا باق سىنايدى.

اتاپ ايتقاندا، بۇعان دەيىن الەكساندر بۋبليك، يۋليا پۋتينتسيەۆا، ەلەنا رىباكينا، ياروسلاۆا شۆەدوۆا، ميحايل كۋكۋشكين جولداما يەلەنگەن.

جۇپتىق سىندا اندرەي گولۋبيەۆ پەن الەكساندر بۋبليك، سونداي-اق ەلەنا رىباكينا مەن ياروسلاۆا شۆەدوۆا سىنعا تۇسەدى.

ەسكە سالايىق، توكيو وليمپياداسىنا سپورتشىلاردى قابىلداۋ 2021-جىلعى 7 - ماۋسىمداعى ATP جانە WTA رەيتينگتەرى نەگىزىندە جۇزەگە اسىرىلدى. ءار ەلدەن قاتىسۋشىلاردىڭ ەڭ كوپ سانى 12 ادامنان اسپاۋى كەرەك (التى ەر ادام جانە التى ايەل). 64 تەننيسشى جەكە، 32 جۇپ - جۇپتىق، 16 جۇپ - ارالاس جۇپتا قاتىسادى.

ەستەرىڭىزگە سالا كەتەيىك، وسىعان دەيىن قازاقستان قۇراماسىندا سپورتتىڭ 27 تۇرىنەن 96 ليتسەنزيا جەڭىپ العانىن جانە ولاردىڭ كىمدەر ەكەنىن جازعان بولاتىنبىز.

ايتا كەتەيىك، وليمپيادا ويىندارى 23- شىلدە مەن 9- تامىز ارالىعىندا توكيو تورىندە وتەدى.

اۆتور: كۇنسۇلتان وتارباي