قازاقستاندا 2020-جىلدىڭ ۇزدىك شاحماتشىلارى انىقتالدى

None
None
نۇر-سۇلتان. قازاقپارات - قازاقستان شاحمات فەدەراتسياسىنىڭ كەزەكتى جىلدىق سەزىنە ەلىمىزدىڭ 14 وبلىسى مەن قالاسىنان 33 دەلەگات كەلىپ، 2020-جىلدىڭ قورىتىندىسى جاسالدى، دەپ حابارلايدى قازاقپارات فەدەراتسيانىڭ باسپا ءسوز قىزمەتىنە سىلتەمە جاساپ.

قازاقستان شاحمات فەدەراتسياسىنىڭ پرەزيدەنتى بەيبىت اتامقۇلوۆ فەدەراتسيانىڭ اتقارۋشى ورگاندارىنا جەمىستى ەڭبەك ەتكەنى ءۇشىن العىس ايتتى. لوكداۋنعا قاراماستان قازاقستان شاحمات فەدەراتسياسى 2020-جىلى 50 حالىقارالىق جانە رەسپۋبليكالىق ءىس-شارا وتكىزىپ، وعان 3,5 مىڭنان اسا كاسىپقوي جانە اۋەسقوي شاحماتشى قاتىستى.

فەدەراتسيا قۇراما مۇشەلەرىنە، ارداگەرلەر مەن جاستارعا قارجىلاي قولداۋ كورسەتىپ، ۇزدىك شاحماتشىلارعا سىياقى تاعايىنداپ وتىردى. ءبىلىم جانە عىلىم مينيسترلىگىمەن بىرلەسە وتىرىپ قازاقستان شاحمات فەدەراتسياسى شاحماتتى سىنىپتان تىس قوسىمشا رەتىندە ەنگىزۋ جۇمىسىن جۇرگىزىپ جاتىر.

ءداستۇرلى دەنە شىنىقتىرۋ ساباعىمەن قاتار، قازاقستاندىق مەكتەپ وقۋشىلارىنىڭ شاحماتپەن اينالىسۋعا مۇمكىندىگى بولادى.

قازاقستان شاحمات فەدەراتسياسى حالىقارالىق رەسپۋبليكالىق Almaty Online Chess Festival 2020 شاحمات مارافونىن وتكىزدى. بۇل بۇكىل شاحمات الەمى ءۇشىن ايتۋلى وقيعا بولدى. جەلتوقساندا فەدەراتسيا جوعارى ۇيىمداسقان-سپورتتىق دارەجەدە ەرلەر مەن ايەلدەر اراسىنداعى چەمپيوناتتى وتكىزدى.

سەزد كەزىندە وتكەن جىلدىڭ ۇزدىك شاحماتشىلارىنىڭ اتى اتالدى. ايەلدەر اراسىندا 2020-جىلدىڭ ۇزدىك سپورتشىسى - كادەتتەر اراسىنداعى الەم چەمپيوناتىندا كۇمىس مەدال جەڭىپ العان 10 جاسار ەلناز قالياحمەت. ەرلەر اراسىنداعى ۇزدىك شاحماتشى 65 جاسقا دەيىنگى ارداگەرلەر اراسىنداعى ازيا چەمپيوناتىندا جەڭىسكە جەتكەن مارات پىرىمبەتوۆ بولدى.

قازاقستاننىڭ ەرلەر قۇراماسى ازيا ۇلتتارى كۋبوگىندا 3-ورىندى جەڭىپ الىپ، 2020-جىلدىڭ ۇزدىك كومانداسى اتاندى. فەدەراتسيانىڭ ۇزدىك سەرىكتەستەرى - پاۆلودار جانە اقتوبە وبلىستارىنىڭ شاحمات فەدەراتسيالارى جانە Air Astana كومپانياسى تانىلدى.

قازاقستان شاحماتشىلارى 2020-جىلى الەم، ەۋروپا جانە ازيا چەمپيوناتتارىندا 4 التىن، 3 كۇمىس جانە 6 قولا مەدالگە قول جەتكىزدى. قازاقستاندىق جاستار 12 حالىقارالىق ماتچتىڭ 11 ىندە جەڭىس تۇعىرىنان كورىنىپ، ازيا ەلدەرى كوماندالارى اراسىندا ەكى حالىقارالىق تۋرنيردە جەڭىمپاز اتاندى.

سوڭعى جاڭالىقتار