ەربولات دوسايەۆ 2020 -جىلى تەڭگەنىڭ السىرەۋ سەبەبى اتادى
بۇل تۋرالى ۇكىمەت وتىرىسىندا ق ر ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.
«2020 -جىلعى جەلتوقساندا مۇناي باعاسىنىڭ ءوسۋى جانە ەكسپورتتاۋشىلاردىڭ سالىق تولەمدەرىن جۇزەگە اسىرۋ ءۇشىن شەتەل ۆاليۋتاسىن ساتۋى ەسەبىنەن وسكەن ىشكى ۇسىنىسپەن قاتار تاۋەكەلدى اكتيۆتەرگە سۇرانىستىڭ ارتۋى تەڭگەنىڭ ايىرباستاۋ باعامىنىڭ ءبىر ا ق ش دوللارى ءۇشىن 425،07 تەڭگەدەن 420،91 تەڭگەگە دەيىن 1 پايىزعا نىعايۋىنا مۇمكىندىك بەردى. جالپى العاندا، 2020 -جىلى ۇلتتىق ۆاليۋتا دامۋشى ەلدەردىڭ باسقا ۆاليۋتالارىمەن قاتار ينۆەستورلاردىڭ تاۋەكەل اكتيۆتەرىنەن شىعۋىنا اكەلگەن كوروناۆيرۋستان تۋىنداعان داعدارىس اياسىندا السىرەدى»، - دەدى ول.
ماسەلەن، ونىڭ ايتۋىنشا، برازيليا رەالى 29، تۇرىك ليراسى 25، ال رەسەي ءرۋبلى 19،3 پايىزعا السىرەدى. 2020 -جىلى تەڭگەنىڭ ايىرباستاۋ باعامى ءبىر ا ق ش دوللارى ءۇشىن 382،60 تەڭگەدەن 420،91 تەڭگەگە دەيىن 10 پايىزعا قۇلدىرادى.
«سىرتقى جاعدايلاردىڭ جاقسارۋىنا بايلانىستى جانە ۇلتتىق بانك ۇكىمەتپەن بىرلەسە وتىرىپ قابىلداعان شارالار كەشەنىنىڭ ارقاسىندا تەڭگەنىڭ ايىرباستاۋ باعامى ناۋرىزداعى 448،5 تەڭگەگە دەيىنگى قۇلدىراۋىن ءبىرشاما ارتقا قالدىرىپ جىلدى جاپقانىن اتاپ ءوتۋ ماڭىزدى. بيىلعى 11 -قاڭتاردا بيرجاداعى ساۋدا- ساتتىق قورىتىندىسى بويىنشا ايىرباستاۋ باعامى ايدىڭ باسىنان بەرى تاعى دا 0,4 پايىزعا نىعايىپ، ءبىر ا ق ش دوللارى ءۇشىن 419,18 تەڭگە بولدى» ، - دەدى ەربولات دوسايەۆ.