ەۋرو-2020: قازاقستان سان-مارينونى جەڭدى
سان- مارينو الەمدەگى ءالسىز قۇرامانىڭ ءبىرى سانالادى. سوندىقتان قازاقستاندىق فۋتبولشىلاردىڭ جەڭىسكە جەتۋ مۇمكىندىگى جوعارى ەدى. ويىن جانكۇيەر كۇتكەندەگىدەي بولدى. ايتا كەتەلىك، قازاقستان قۇراماسى I -توبىندا سىنعا ءتۇسىپ جاتىر.
ەستەرىڭىزگە سالا كەتسەك، ەكى قۇراما بيىلعى 11 -ماۋسىمدا ەلوردادا ءبىر مارتە كەزدەسىپ ۇلگەردى.
بۇل كەزدەسۋدە قازاقستاندىق فۋتبولشىلار قارسىلاسىن 4:0 ەسەبىمەن تىزە بۇكتىرگەن بولاتىن.
قازاقستاندىق فۋتبولشىلار جىلدام گول سوعىپ ۇلگەردى. بۇل گولدى 6-مينۋتتا باكتيار زاينۋتدينوۆ ورىندادى. ال 22-مينۋتتا عافۋرجان سۇيىمبايەۆ ەسەپتى ۇلعايتا ءتۇستى. بۇدان كەيىن دە قازاقستاندىق قۇراما ويىن تىزگىنىن ءوز قولىنان شىعارعان جوق. ناتيجەسىندە ءبىرىنشى كەزەڭ اياقتالعانعا دەيىن ولار تاعى ءبىر مارتە قارسىلاستار قاقپاسىن ءدال كوزدەدى. بۇل گول شابۋىلشى الەكسەي شەتكيننىڭ ەنشىسىنە جازىلدى. ءبىرىنشى كەزەڭدە قازاقستاندىق فۋتبولشىلار الاڭ يەلەرىن 3:0 ەسەبىمەن تىزە بۇكتىردى.
ەكىنشى كەزەڭدە دە قازاقستان قۇراماسى ويىن تىزگىنىن قولىنان شىعارعان جوق. دەگەنمەن الاڭ يەلەرى كوپ جاعدايدا ساۋاتتى قورعانا ءبىلدى. قازاقستاندىق فۋتبولشىلار الاڭنىڭ قوس قاناتىنان دا شابۋىل ۇيىمداستىردى. ەسەسىنە 76-مينۋتتا سان- مارينو ساپىنان فيليپپو بەراردي قازاقستاندىق قاقپادان ساڭىلاۋ تاپتى.
وسىلايشا ولار 2017 -جىلدىڭ 4 -قىركۇيەگىنەن كەيىن گول سوعىپ وتىر. ول جولى سىرت الاڭدا ازەربايجاننان 1:5 ەسەبىمەن جەڭىلىپ قالدى. جالپى العاندا، سان-مارينولىق فۋتبولشىلار الەم جانە ەۋروپا چەمپيوناتىنىڭ ىرىكتەۋ ساتىسىندا بۇگىنگى كۇنگە دەيىن بار-جوعى 18 عانا گول سوققان.
بۇگىنگى كەزدەسۋدە قازاقستان قۇراماسى قارسىلاسىن 3:1 ەسەبىمەن تىزە بۇكتىردى.
سونداي- اق، بۇگىن I توبىندا سىرت الاڭدا شوتلانديانى 2:1، بەلگيا رەسەيدى 4:1 ەسەبىمەن جەڭدى. بۇل تۋردان كەيىن 27 ۇپايمەن بەلگيا كوش باستاپ تۇرسا، ودان كەيىنگى ورىنداعى رەسەيدىڭ 21 ۇپايى بار. ال شوتلانديا 12، كيپر مەن قازاقستان 10 ۇپاي ەنشىلەسە، سان- مارينو ءالى بىردە-ءبىر ۇپاي ەنشىلەگەن جوق.
ەندى سوڭعى تۋردا بەلگيا مەن كيپر، سان- مارينو مەن رەسەي، شوتلانديا مەن قازاقستان قۇرامالارى كەزدەسەدى.
فوتو: kff.kz
اۆتور: ءادىلجان ۇمبەت