كوپبالالى وتباسىلارعا 2020 -جىلدان باستاپ جاڭا مەملەكەتتىك جاردەماقى بەرىلەدى
بۇل تۋرالى بۇگىن پارلامەنت ءماجىلىسىنىڭ جالپى وتىرىسىنان كەيىن تىلشىلەرگە قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«ەگەر دە ءبىزدىڭ ۇسىنىمىز قولداۋعا يە بولسا، ياعني ءتيىستى زاڭ جوباسى قابىلدانسا، 1 -قاڭتاردان باستاپ وسى جاردەماقىنى تولەۋدى جوسپارلاپ وتىرمىز»، - دەدى ب. نۇرىمبەتوۆ.
ءمينيستردىڭ سوزىنە قاراعاندا، ەلىمىزدە كوپبالالى 343 مىڭ وتباسى بار. سولاردىڭ ىشىندە ءتورت بالالىلارى 61 پايىزدى، بەس بالالىلار - 27 پايىز، التى بالالىلار - 9 پايىز، جەتى جانە ودان كوپ بالاسى بارلار 3 پايىز دەڭگەيىندە.
بۇدان بۇرىن حابارلانعاداي، كوپبالالى وتباسىلاردىڭ قۇرامىنداعى بالالارعا تابىسقا قاراماستان مەملەكەتتىك جاردەماقىنى بەرۋ ۇسىنىلعان.
سوندىقتان ۇسىنىلىپ وتىرعان جاڭا ۇستانىمدار كوپبالالى انالاردى قولداۋدى، جاڭارتىلعان اتاۋلى الەۋمەتتىك كومەكتى، كەپىلدى الەۋمەتتىك توپتامانى قامتيتىن بولادى. كوپبالالى وتباسىلارعا بەرىلەتىن جاڭا مەملەكەتتىك جاردەماقىنى وتباسى بالالارىنىڭ سانىنا قاراي 42500 تەڭگەدەن 73 مىڭ تەڭگەگە دەيىن سارالانعان.
اۆتور: رۋسلان عابباسوۆ