ەۋرو-2020: قازاقستان قۇراماسى كيپرمەن تەڭ ءتۇستى

None
None
نۇر-سۇلتان. قازاقپارات - فۋتبولدان 2020-جىلعى ەۋروپا بىرىنشىلىگىنىڭ ىرىكتەۋ كەزەڭى اياسىندا قازاقستان قۇراماسى سىرت الاڭدا كيپرمەن كەزدەستى، دەپ حابارلايدى قازاقپارات ءتىلشىسى.

ەستەرىڭىزگە سالا كەتەيىك، قازاقستاندىقتار I توبىندا سىنعا تۇسەدى. قارسىلاستارى - بەلگيا، رەسەي، شوتلانديا، سان-مارينو جانە كيپر قۇرامالارى. كەزدەسۋدە ءبىزدىڭ قۇراما ساپىندا العاشقى مينۋتتان دميتري نەپوگودوۆ، عافۋرجان سۇيىمبايەۆ، تەمىرلان ەرلانوۆ، سەرگەي مالىي، الەكساندر ماروچكين، يان ۆوروگوۆسكي، يسلامبەك قۋات، يۋري پەرتسۋح، اسحات تاعىبەرگەن، باۋىرجان يسلامحان، الەكسەي شەتكين شىقتى.

ولارعا قارسى كيپرلىق فۋتبولشىلار - كوستاس پاناي، نيكولاس ياننۋ، كوستاس لايفيس، گيورگوس مەركيس، كوستاس ميديككيس، حامبوس كيرياكۋ، ياننيس كۋسۋلوس، گريگوريس كاستانوس، فوتيس پاپۋليس، گەورگە ەفرەم، جانە پيەروس سوتيريۋ وينادى.

ايتا كەتەرلىگى، قازاقستان مەن كيپر قۇرامالارىنىڭ شەبەرلىك دەڭگەيى شامالاس. كيپرلىقتار بۇگىنگى كۇنگە دەيىن الەم جانە ەۋروپا بىرىنشىلىگىنىڭ فينالدىق ساتىسىندا باق سىناپ كورگەن جوق.

ىرىكتەۋ كەزەڭىندە تۋرنير كەستەسىندە نەگىزىنەن تومەنگى ورىنداردا كورىنەدى. قوس قۇراما بۇعان دەيىن ەكى مارتە جولداستىق كەزدەسۋ وتكىزدى. العاشقىسىندا 2004-جىلدىڭ 21- اقپانىندا كيپر حالىقارالىق تۋرنيرىندە جولىعىپ، ءبىزدىڭ قۇراما الاڭ يەلەرىنەن 1:2 ەسەبىمەن جەڭىلىپ قالدى. ودان كەيىن 2017-جىلدىڭ 22- ناۋرىزىندا سول ەلدە جولداستىق كەزدەسۋدە شەبەرلىك بايقاستى.

بۇل كەزدەسۋدە قۇرامامىز 1:3 ەسەبىمەن قارسىلاسىنا ەسە جىبەردى. سوندىقتان بۇگىنگى كەزدەسۋ العاشقى مينۋتتان تارتىستى ءوربىدى. ءبىزدىڭ قۇراما جىلدام گول سوعىپ كەتتى. ونى 2-مينۋتتا شابۋىلشى الەكسەي شەتكين ورىندادى. وعان ارىپتەسى عافۋرجان سۇيىمبايەۆ ادەمى پاس شىعارىپ بەردى. بۇدان كەيىن الاڭ يەلەرى نامىسقا تىرىسىپ، العا قاراي ۇمتىلدى.

دەگەنمەن، كوزدەگەن ماقساتىنا جەتە العان جوق. تەك 39-مينۋتتا پيەروس سوتيريۋ تارازى باسىن تەڭەستىردى. ءبىرىنشى كەزەڭ اياقتالار تۇستا ايىپ دوبىن شەبەر ورىنداعان باۋىرجان يسلامحان تەپكەن دوپتى قارسىلاس قۇراما قاقپاشىسى ارەڭ سىرتقا شىعارىپ ۇلگەردى.

ەكىنشى كەزەڭدە قوس قۇراما ەسەپتى وزگەرتۋگە تىرىستى. اسىرەسە الاڭ يەلەرىنىڭ بەلسەندىلىگى ايقىن اڭعارىلدى. دەگەنمەن ويىن ەسەبى وزگەرگەن جوق.

كەزدەسۋ 1:1 ەسەبىمەن تەڭ اياقتالدى. قازاقستان ەندى 9- قىركۇيەكتە سىرت الاڭدا رەسەي قۇراماسىمەن وينايدى.

بۇگىنگە دەيىن ءبىزدىڭ فۋتبولشىلار ءتورت ويىن وتكىزدى. الدىمەن 21- ناۋرىزدا ءوز الاڭىندا شوتلانديانى 3:0 ەسەبىمەن ويسىراتا جەڭسە، ودان كەيىن 24- ناۋرىزدا رەسەيگە 0:4 ەسەبىمەن جول بەردى. ال 8- ماۋسىمدا سىرت الاڭدا بەلگيادان 0:3 ەسەبىمەن جەڭىلسە، 11- ماۋسىمدا ەلوردادا سان- مارينونى 4:0 ەسەبىمەن تىزە بۇكتىردى.

بۇگىن ءبىزدىڭ توپتا تاعى ەكى كەزدەسۋ وتكىزىلەدى. توپتىڭ ۇزدىكتەرى رەسەي شوتلاندياعا، بەلگيا سان-ماريونوعا قوناققا بارادى.

سوڭعى جاڭالىقتار