توكيو-2020: وليمپيادانىڭ باستالۋىنا تۋرا ءبىر جىل قالدى
2020-جىلدىڭ 24- شىلدەسى مەن 9- تامىزى ارالىعىندا جاپونيا استاناسى توكيو ХХХІІ جازعى وليمپيادا ويىندارىن قابىلدايدى. بۇگىنگى تاڭدا ءتورتجىلدىقتىڭ باستى دوداسىنا كۇنشىعىس ەلى قىزۋ دايىندىق جۇرگىزىپ جاتىر.
اشىلۋ سالتاناتىنان بۇرىن، ياعني 2020-جىلدىڭ 22- شىلدەسىندە فۋتبول مەن سوفتبولدان ىرىكتەۋ سىنى باستالادى. سونداي-اق، اشىلۋ سالتاناتى وتەتىن كۇنى ەسكەك ەسۋ مەن ساداق اتۋ سپورتىنىڭ وكىلدەرى جارىس جولىنا شىعادى. 2020-جىلعى توكيو وليمپياداسىنىڭ ءبىرىنشى جارىس كۇنىندە سپورتتىڭ 21 تۇرىنەن جارىستار وتەدى. ونىڭ ىشىندە ۇستەل تەننيسى، تەننيس، دزيۋدو، بادمينتون، گيمناستيكا، تەننيس پەن ۆەلوسپورت بار.
توكيو-2020 ويىندارىنىڭ باعدارلاماسىنا قوسىلعان 3x3 باسكەتبول، سكەيتبوردينگ پەن سەرفينگ العاشقى دەمالىستا باستالىپ، بۇكىل ويىن بارىسىندا ەل نازارىنا ۇسىنىلادى.
2020-جىلدىڭ 1- تامىزىندا وليمپيادا ويىندارىنا العاش رەت ەنگەن سپورت تۇرلەرىنەن كوپتەگەن جۇلدە ءوز يەسىن تاپپاق. اتاپ ايتار بولساق، دزيۋدودان كوماندالىق جارىس، ترياتلوننان ارالاس كوماندالىق ەستافەتا جانە ارالاس كوماندالىق اتۋدان مەدالدار جيىنتىعى ساراپقا سالىنادى. بۇل كۇنى سپورتتىڭ 23 تۇرىنەن جارىس وتەدى.
توكيو-2020 وليمپياداسىنىڭ ەڭ سوڭعى جارىس كۇنىندە ەرلەر اراسىنداعى مارافون باستالادى. الەمدەگى ۇزدىك التى مارافون قاتارىنا ەنەتىن جىل سايىنعى توكيو مارافونى ەندى ميلليونداعان كورەرمەننىڭ نازارىن اۋدارماق.
توكيو-2020 وليمپياداسىندا 42 سپورت نىسانى جۇمىس ىستەيدى. بۇگىنگە دەيىن 24 نىسان جۇمىس ىستەپ تۇر، 10 ۋاقىتشا نىسان جانە 8 جاڭا نىسان سالىنادى.
اۆتور: كۇنسۇلتان وتارباي