ەۋرو-2020: قازاقستان قۇراماسى رەكورد جاڭارتتى

نۇر- سۇلتان. قازاقپارات - فۋتبولدان 2020 -جىلعى ەۋروپا بىرىنشىلىگى ىرىكتەۋ كەزەڭىنىڭ I توبىنىڭ ءتورتىنشى تۋر ويىنىنداعى قازاقستان مەن سان- مارينو قۇرامالارى اراسىنداعى كەزدەسۋ مارەسىنە جەتتى، دەپ حابارلايدى قازاقپارات ءتىلشىسى.

ميحال بيلەك بۇگىنگى كەزدەسۋدە وتكەن ويىننان ءبىرقاتار وزگەرىستەر ەنگىزدى.

 ول دميتريي نەپوگودوۆ، عافۋرجان سۇيىمبايەۆ، تەمىرلان ەرلانوۆ، سەرگەي مالىي، دميتريي شومكو، يان ۆوروگوۆسكيي، يسلامبەك قۋات، باۋىرجان يسلامحان، اسحات تاعىبەرگەن، ابات ايىمبەتوۆ، باۋىرجان تۇرىسبەك سەكىلدى ويىنشىلارعا العاشقى مينۋتتان سەنىم ءبىلدىردى. چەح مامانى بۇگىن عافۋرجان سۇيىمبايەۆ، دميتريي شومكو، باۋىرجان يسلامحان، اسحات تاعىبەرگەن، ابات ايىمبەتوۆ جانە باۋىرجان تۇرىسبەك ويىنعا العاشقى مينۋتتان قوسىلاتىن بولادى. وتكەن ويىندا باۋىرجان يسلامحان، اسحات تاعىبەرگەن جانە ابات ايىمبەتوۆ ەكىنشى كەزەڭدە ويىنشىلاردى الماستىرعان بولاتىن.

ال سان- مارينو قۇراماسىنىڭ باس باپكەرى فرانكو ۆاررەللا العاشقى مينۋتتان ەليا بەنەدەتتيني، داۆيدە چەزاريني، فابيو ۆيتايولي، كريستيان بروللي، اندرەا گراندوني، لورەنتسو لۋنادەي، لۋكا چەنسوني، مارچەللو مۋلاروني، مانۋەل باتتيستيني، نيكولا نانني، ماتتەو ۆيتايولي سىندى شاكىرتتەرىنە ءۇمىت ارتتى.

سان- مارينو فۋتبول فەدەراتسياسى 1931 -جىلى قۇرىلعان. دەگەنمەن، FIFA جانە UEFA قۇرامىنا 1988 -جىلى قابىلداندى. ولار - الەمدەگى ەڭ ءالسىز قۇرامانىڭ ءبىرى. FIFA- نىڭ سوڭعى رەيتينگىندە 211 قۇرامانىڭ اراسىندا ەڭ سوڭعى ورىندا تۇر. وسىنىڭ ءوزى ولاردىڭ الەۋەتى قانداي ەكەنىن ايقىنداي تۇسەدى.

وتكەن تۋردا سان- مارينو سىرت الاڭدا رەسەيدەن 0:9 ەسەبىمەن جەڭىلسە، قازاقستان بەلگياعا 0:3 ەسەبىمەن جول بەردى.

قوس قۇراما دا وتكەن تۋردا كەتكەن ەسەنى وسى جولى قايتارۋعا تىرىستى. راس، سان- مارينو بۇل جولى دا جەڭىسكە جەتەدى دەگەن ەشقانداي جورامال جاسالعان جوق. ولار ەۋروپا بىرىنشىلىگى ىرىكتەۋ كەزەڭىندە بارلىعى 69 ويىن وتكىزدى. ولار ءبىر مارتە ءوز الاڭىندا 2014 -جىلدىڭ 15 - قاراشاسىندا ەستونيامەن 0:0 ەسەبىمەن تەڭ ءتۇسىپ، قالعانىنىڭ بارلىعىندا جەڭىلدى. بۇل تۋرنيردەگى ەڭ ءىرى جەڭىلىسىندە 2006 -جىلدىڭ 6 - قىركۇيەگىندە گەرمانيادان 0:13 ەسەبىمەن جول بەرگەن .

بۇگىنگى كەزدەسۋدە ويىن تىزگىنى ءبىزدىڭ قۇرامادا بولدى. العاشقى مينۋتتاردا سان- مارينو فۋتبولشىلارى قازاقستاندىق فۋتبولشىلاردى مازالاپ كورگەن ەدى. دەگەنمەن ولار دىتتەگەن ماقساتىنا جەتە العان جوق. بۇدان كەيىن ءبىزدىڭ جىگىتتەر شابۋىل شەبىن كۇشەيتە ءتۇستى. الايدا وعان قوناقتار تەگەۋرىندى قارسىلىق كورسەتتى. العاشقى گول 45-مينۋتتا سوعىلدى. سول قاناتتان عافرجان سۇيىمبايەۆتىڭ بەرگەن پاسىن يسلامبەك قۋات شەبەر پايدالاندى.

ەكىنشى كەزەڭدە دە سان- مارينو نەگىزىنەن قورعانىس شەبىندە ءجۇردى. ال 62-مينۋتتا ماكسيم فەدين ەسەپتى ۇستەمەلەي ءتۇستى. ەل بىرىنشىلىگىندە قوستانايدىڭ «توبىل» كومانداسى وينايتىن ول ءتورت مينۋت بۇرىن قازاقستاندىق شابۋىلشى ابات ايىمبەتوۆتى الماستىرعان بولاتىن. ودان كەيىن 66-مينۋتتا عافرجان سۇيىمبايەۆ تاعى ءبىر گول سوقتى. ەسەپ 3:0. قازاقستان جەڭىسكە جەتۋگە جاقىنداي ءتۇستى. قورىتىندى ەسەپتى 79-مينۋتتا ءبىزدىڭ قۇرامانىڭ كاپيتانى باۋىرجان يسلامحان بەلگىلەدى. قازاقستان قۇراماسى اتالمىش قارسىلاسىن 4:0 ەسەبىمەن تىزە بۇكتىردى. قازاقستان قۇراماسى وسىلايشا ءىرى ەسەپپەن جەڭدى.

ءوز تاريحىندا ءبىزدىڭ قۇراما رەكورد جاڭارتىپ وتىر. بۇدان بۇرىن قازاقستاندىق كوماندا بيىل 21 - ناۋرىزدا شوتلانديا قۇراماسىن 3:0 ەسەبىمەن تاس- تالقان ەتكەن ەدى. ال الەم بىرىنشىلىگى ىرىكتەۋ كەزەڭىندەگى ەڭ ءىرى جەڭىسى 1997 -جىلدىڭ 11 - ماۋسىمىندا تىركەلدى. سول كەزدە ازيا قۇرلىعىندا دوپ تەبەتىن قازاقستان قۇراماسى پاكىستاندى 7:0 ەسەبىمەن تىزە بۇكتىرگەن ەدى.

 بۇگىن I توبىندا تاعى ەكى كەزدەسۋ وتكىزىلەدى. ءوز الاڭىندا بەلگيا شوتلانديانى، رەسەي كيپردى قابىلدايدى.

ءبىزدىڭ قۇراما ەندى 6 - قىركۇيەكتە سىرت الاڭدا كيپرمەن كەزدەسەدى. ال 9 - قىركۇيەكتە سىرت الاڭدا رەسەيمەن شەبەرلىك بايقاسادى.