توكيو-2020: وليمپيادا ويىندارىنىڭ جارىس كەستەسى جاريالاندى
بۇگىن ق ر ۇلتتىق وليمپيادالىق كوميتەتى ءتورت جىلدىق باستى دودانىڭ جارىس كەستەسىن رەسمي سايتىندا جاريالادى.
وندا «2020-جىلدىڭ 24- شىلدەسى مەن 9- تامىزى ارالىعىندا ۇيىمداستىرىلاتىن ءدۇبىرلى سىندا سپورتتىڭ 33 تۇرىنەن 339 سپورتتىق وقيعا وتەدى دەپ جوسپارلانۋدا. بۇل رەكوردتى كورسەتكىش»، - دەپ اتاپ وتىلگەن.
حابارلامادا ايتىلعانداي، وليمپيادا ويىندارىندا ادەتتەگىدەي فۋتبول دوداسى ەرتە باستالادى. ياعني، 22- شىلدە كۇنى بەيسبول مەن فۋتبولدان تۇساۋكەسەر ماتچتار وتەدى. اشىلۋ سالتاناتى وتەتىن كۇنى ەسكەك ەسۋ مەن ساداق اتۋشىلار جارىسى جوسپارلانعان.
ال وليمپيادانىڭ العاشقى جۇلدەلەر جيىنى 25-شىلدە كۇنى ءوز يەسىن تاپپاق. جەرگىلىكتى ۋاقىتپەن 8:30 دا ايەلدەر اراسىندا 10 مەترگە پنيەۆماتيكالىق ۆينتوۆكامەن وق اتۋدان جەڭىمپازدار انىقتالادى.
سونداي-اق، 6 سپورت تۇرىنەن قاتىسۋشىلار جۇلدەگە تالاسىپ، ساداق اتۋ، ۆەلوجارىس، سەمسەرلەسۋ، دزيۋدو، تاەكۆوندو جانە اۋىر اتلەتيكادان جالپى ەسەبى 11 مەدال جيىنتىعى ساراپقا سالىنادى.
ايەلدەر مەن ەرلەر اراسىنداعى 3x3 باسكەتبول باسەكەسى 25- شىلدە كۇنى باستالادى. سكەيتبوردينگ 26- جانە 27- شىلدەگە جوسپارلانعان.
1- جانە 2- تامىز كۇندەرى ەڭ كوپ جۇلدە تاراتىلادى. سەنبى، 1- تامىز كۇنى جالپى ەسەبى 21 سپورتتىق باسەكە جوسپارلانعان. وليمپيادا ويىندارىنا العاش رەت ەنگەن دزيۋدودان ارالاس كوماندالىق سىن، ترياتلون مەن اتۋدان ارالاس كوماندالىق باسەكەدەن سول كۇنى وليمپيادا چەمپيوندارىن انىقتايمىز.
جەكسەنبى، 2-تامىز كۇنى جۇگىرۋدەن ايەلدەر اراسىنداعى مارافون، 100 مەترگە جارىسۋدان ەرلەر اراسىنداعى فينال، ەرلەر مەن ايەلدەر اراسىنداعى سپورتتىق گيمناستيكا باسەكەسىنىڭ فينالى، سونداي-اق، تەننيستەن ەرلەر اراسىنداعى تۋرنيردىڭ اقتىق سىنى وتەدى. اتالعان جارىس كۇنىندە سەمسەرلەسۋ مەن جۇزۋدەن سوڭعى مەدالدار جيىنتىعى تاراتىلادى.
جابىلۋ سالتاناتىنان ءبىر كۇن بۇرىن، ياعني، 8- تامىز كۇنى 30 فينالدىق باسەكەنىڭ كۋاگەرى اتانامىز. بۇل وليمپيادا ويىندارىنداعى ەڭ تارتىسقا تولى كۇن بولماق. فۋتبول مەن بەيسبولدان، باسەتبول مەن تاعى دا كوپتەگەن سپورت تۇرلەرىنەن وليمپيادا جەڭىمپازدارى مەن جۇلدەگەرلەرى انىقتالادى.
وليمپيادانىڭ سوڭعى جارىس كۇنى ەرلەر اراسىنداعى مارافوننان باستالادى. تاپ وسى كۇنى توكيو كوشەلەرىندە حالىق كوبەيىپ، ءتورتجىلدىق دوداسى مارەسىنە جەتەدى. توكيو وليمپياداسىنىڭ ەڭ سوڭعى التىن جۇلدەسىن سۋ دوبىنان ەرلەر كومانداسى ساراپقا سالادى.
ايتا كەتەيىك، ءدال بۇگىنگى كەرى ساناۋ ساعاتى بويىنشا توكيو-2020 وليمپياداسىنىڭ باستالۋىنا 463 كۇن عانا ۋاقىت قالدى.
اۆتور: كۇنسۇلتان وتارباي