13:59, 21 - ناۋرىز 2019 | GMT +6
توكيودا 2020-جىلى وتەتىن وليمپيادا الاۋى قانداي بولادى؟
استانا. قازاقپارات - بۇگىن جاپونيا استاناسى توكيودا 2020-جىلعى وليمپيادا ويىندارىنىڭ الاۋى تانىستىرىلدى، دەپ حابارلايدى قازاقپارات ۇلتتىق وليمپيادا كوميتەتىنە سىلتەمە جاساپ.
جازعى ويىنداردىڭ الاۋى ساكۋرا سەكىلدى بەزەندىرىلگەن. بەكىتىلگەن تۇجىرىمداما بويىنشا، ءاربىر «جاپىراقتان» بولەك وت تۇتانىپ، سوڭىندا ءبارى ءبىرتۇتاس الاۋعا اينالادى.
الاۋدىڭ سالماعى 1,2 كەلىگە جۋىقتايدى، بيىكتىگى 71 سانتيمەتر. الاۋدى دايىنداۋ كەزىندە 2011-جىلدىڭ 11- ناۋرىزىندا جاپونيانىڭ سولتۇستىك-شىعىسىندا جەر سىلكىنىسى مەن تسۋناميدەن زارداپ شەككەندەرگە ۋاقىتشا سوعىلعان ۇيلەردەگى مىس قولدانىلدى.
2020-جىلعى توكيو وليمپياداسىنىڭ الاۋى ءداستۇر بويىنشا گرەكيادا جاعىلادى. جەتى كۇننەن سوڭ كۇنشىعىس ەلىنە جەتەتىن الاۋ ەستافەتاسى 26- ناۋرىزدا باستالادى.