وتكەن 2020 -جىلى جول اپاتىنان قازا تاپقاندار سانى 17 پايىزعا ازايدى
بۇل تۋرالى ق ر ىشكى ىستەر مينيسترلىگىنىڭ رەسمي وكىلى نۇردىلدا وراز ايتتى، دەپ حابارلايدى قازاقپارات ءتىلشىسى.
رەسمي وكىلدىڭ ايتۋىنشا، ىشكى ىستەر مينيسترلىگىنىڭ القا ماجىلىسىندە جول قاۋىپسىزدىگىن قامتاماسىز ەتۋ تاقىرىبى كوتەرىلدى. پوليتسيانىڭ ەل جولدارىندا باقىلاۋدى كۇشەيتەتىنى اتاپ ءوتىلدى.
«جول قوزعالىسى ەرەجەلەرىن بۇزۋدى تىركەۋ جۇيەلەرىنىڭ جەلىسىن كەڭەيتۋ جانە ينتەللەكتۋالدى كامەرالاردى ەنگىزۋ بويىنشا شارالار قابىلدانۋدا. وتكەن جىلى 5,7 ميلليوننان استام جول قوزعالىسى ەرەجەلەرىن بۇزۋشىلىققا جول بەرىلمەدى. ونىڭ 2,6 ميلليونى اۆتوماتتى تىركەۋ جۇيەسىنىڭ كومەگىمەن انىقتالدى. جولداردىڭ اپاتتى جانە قاۋىپتى ۋچاسكەلەرىن تەكسەرۋ بويىنشا جۇمىس جانداندىرىلدى. جول ينفراقۇرىلىمىن جاقسارتۋ ماقساتىندا جاۋاپتى تۇلعالارعا 25 مىڭنان استام نۇسقاما بەرىلدى»، - دەدى ول.
ونىڭ اتاپ وتۋىنشە، جول جاعدايى قولايسىز نەمەسە كولىكتىڭ تەحنيكالىق جاي-كۇيى سايكەس كەلمەگەن جەرلەردە پوليتسيا قىزمەتكەرلەرى جولدى نەمەسە كولىكتى كۇتىپ ۇستاۋعا جاۋاپتى ادامدارعا قاتاڭ شارا قولدانادى. جەرگىلىكتى اتقارۋشى ورگاندارمەن بىرلەسىپ كوشەلەر مەن جولداردى قورشاۋمەن، جاياۋ جۇرگىنشىلەر وتكەلىمەن، قوسىمشا باعدارشاممەن، جول بەلگىلەرىمەن، اپاتتىق بايلانىسپەن جابدىقتاۋ شارالارىنا ەرەكشە كوڭىل بولىنەدى.
«اۆتوپاترۋل ارقىلى جول قوزعالىسىن قاداعالاۋدى ەكى مىڭعا جۋىق ەكيپاج جۇزەگە اسىرادى. وتكەن جىلى اتقارىلعان جۇمىستىڭ ناتيجەسىندە جول-كولىك وقيعالارىنىڭ سانى - 18,7 پايىزعا، وندا قازا تاپقاندار - 17 پايىزعا جانە زارداپ شەككەندەر - 19,5 پايىز قىسقاردى»، - دەدى نۇردىلدا وراز.