ۇكىمەت 2020 -جىلى 17 زاڭ جوباسىن ازىرلەيدى

نۇر-سۇلتان. قازاقپارات - قازاقستان ۇكىمەتى 2020 -جىلى 17 زاڭ جوباسىن ازىرلەيدى.

بۇل تۋرالى بۇگىن ۇكىمەت وتىرىسىندا ق ر ادىلەت ءمينيسترى مارات بەكەتايەۆ ايتتى، دەپ حابارلايدى قازاقپارات ءتىلشىسى.

«ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا مۇشەلەرىمەن بىرلەسىپ، ۇكىمەتتىڭ زاڭ جوبالاۋ جۇمىستارىنىڭ 2020 -جىلعا ارنالعان جوسپار جوباسىن ازىرلەدى. جوسپار جوباسى مەملەكەت باسشىلىعىنىڭ تاپسىرمالارى جانە ستراتەگيالىق قۇجاتتاردا ايقىندالعان مىندەتتەر نەگىزىندە ازىرلەندى. جوسپار جوباسى كەلەسى جىلى 17 زاڭ جوباسىن ازىرلەۋدى كوزدەيدى. ازىرلەنەتىن زاڭ جوبالارى ءارتۇرلى سالالاردى ودان ءارى دامىتۋعا باعىتتالعان»، - دەدى مينيستر.

مىسالى، ونىڭ ايتۋىنشا، زاڭ جوبالارى الەۋمەتتىك قامسىزداندىرۋ، دەنە شىنىقتىرۋ جانە سپورت، اسكەري قىزمەت جانە ارنايى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى سياقتى ماسەلەلەر. الداعى جىلى «ەرەكشە تاۋارلاردى باقىلاۋ تۋرالى»، «وسىمدىكتەر الەمى تۋرالى» جانە «ارداگەرلەر تۋرالى» جاڭا جەكەلەگەن زاڭ جوبالارىن ازىرلەۋ كوزدەلىپ وتىر.

«جوسپار جوباسىندا مەملەكەت باسشىسىنىڭ قازاقستان حالقىنا جولداۋىن، سونداي-اق پرەزيدەنتتىڭ سايلاۋالدى باعدارلاماسىن ىسكە اسىرۋعا باعىتتالعان ءبىرقاتار زاڭ جوبالار دا كوزدەلگەن. ولار: مەملەكەتتىك ساتىپ الۋ، دەنە شىنىقتىرۋ جانە سپورت، اۋداندىق، قالالىق جانە اۋىلدىق دەڭگەيدەگى بيلىكتىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا زاڭ جوبالار»، - دەدى ول.

مينيستر دەرەگىنشە، ازىرلەنەتىن زاڭ جوبالارىنىڭ ەڭ كوبى - يندۋستريا جانە ينفراقۇرىلىمدىق دامۋ مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگىنە تيەسىلى. ءارقايسىسى 3 زاڭ جوباسىنان ازىرلەيدى. قارجى، ۇلتتىق ەكونوميكا، سىرتقى ىستەر، مادەنيەت جانە سپورت، گەولوگيا جانە تابيعي رەسۋرستار، مينيسترلىكتەرى 2 زاڭ جوباسىنان ازىرلەيتىن بولادى. قورعانىس مينيسترلىگى 1 زاڭ جوباسىن ازىرلەيدى.