فوتوشولۋ: 2019 -جىلى نۇرسۇلتان نازاربايەۆ قانداي شارالارعا قاتىستى
قازاقستان رەسپۋبليكاسىنىڭ تۇڭعىش پرەزيدەنتى كۇنىنە وراي قازاقپارات اگەنتتىگى 2019 -جىلى ەلباسى قاتىسقان شارالارعا شولۋ ۇسىنادى.
2018 -جىلدىڭ قازان ايىندا قازاقستان حالقىنا جولداۋىندا ەلباسى 2019 -جىلدى جاستار جىلى دەپ جاريالاۋدى ۇسىنعان بولاتىن. ال 23 -قاڭتاردا تۇڭعىش پرەزيدەنت «تاۋەلسىزدىك ۇرپاقتارى» اتتى جاستار جىلىنىڭ سالتاناتتى اشىلۋ راسىمىنە قاتىستى. سالتاناتتى شارادا ءتۇرلى سالادا جەتىستىككە جەتكەن بەلسەندى جاستاردى تىڭداپ، «جاس كاسىپكەر»، «جاس مامان» باعدارلامالارى، جاستارعا ارنالعان باسپانا، اۋىل جاستارى، جاس عالىمدار گرانتى سىندى ماڭىزدى باستامالاردى كوتەردى.
19 -ناۋرىزدا نۇرسۇلتان نازاربايەۆ وتاندىق تەلەارنالار ارقىلى حالىققا ۇندەۋ ارناپ، پرەزيدەنتتىك وكىلەتتىگىن توقتاتاتىنىن مالىمدەدى. سايكەسىنشە، قازاقستاندى باسقارۋعا ناعىز لايىقتى ازامات رەتىندە سول كەزدەگى پارلامەنت سەناتىنىڭ ءتوراعاسى قاسىم- جومارت توقايەۆقا سەنىم ءبىلدىردى.
20 -ناۋرىزدا رەسپۋبليكا پرەزيدەنتى وكىلەتتىگىن ۋاقىتشا اتقاراتىن قاسىم- جومارت توقايەۆتىڭ قازاقستان حالقىنا انت بەرۋ ءراسىمى ءوتتى. سالتاناتتى جيىندا قاسىم- جومارت توقايەۆ نۇرسۇلتان نازاربايەۆقا «التىن جۇلدىز» وردەنىن تاپسىرىپ، «حالىق قاھارمانى» اتاعىن بەردى. سونىمەن بىرگە، تۇڭعىش پرەزيدەنتكە مونۋمەنت ورناتۋدى، نازاربايەۆ ەسىمىن وبلىستىق قالالاردىڭ ورتالىق كوشەلەرىنە بەرۋدى جانە استانا قالاسىنىڭ اتاۋىن نۇرسۇلتان دەپ وزگەرتۋدى ۇسىندى.
21 -ناۋرىزدا ەكسپو اۋماعىندا ۇيىمداستىرىلعان ناۋرىز مەيرامىنا ەلباسى نۇرسۇلتان نازاربايەۆ پەن قر پرەزيدەنتى قىزمەتىنە كىرىسكەن قاسىم-جومارت توقايەۆ بىرگە قاتىستى. تۇڭعىش پرەزيدەنت شاڭىراق كوتەرگەن ەلوردالىق جاستارعا باتا بەرىپ، ەلدەگى تىنىشتىقتىڭ ساقتالۋىن، ءاربىر وتباسىنىڭ ءوسىپ- وركەندەۋىن تىلەدى.
ءساۋىر ايىنىڭ باسىندا ەلباسى تۋعان جەرى شامالعانعا باردى. ساپار بارىسىندا نۇرسۇلتان نازاربايەۆ ق ر تۇڭعىش پرەزيدەنتىنىڭ «اتامەكەن» تاريحي- مادەني ورتالىعىن ارالاپ، اۋىلداستارىمەن كەزدەستى. سودان كەيىن شامالعان كەنتىندەگى دەنە شىنىقتىرۋ جانە ساۋىقتىرۋ كەشەنىنىڭ قۇرىلىسىن تەكسەردى. بۇقارالىق سپورتتى دامىتۋعا ارنالعان بۇل كەشەن قۇرىلىسى ەلباسىنىڭ تىكەلەي قولداۋىمەن جانە ونىڭ جەكە قاراجاتىنا سالىنۋدا.
23 -ساۋىردە «Nur Otan» پارتياسىنىڭ XIX سەزىندە ەلباسى قاسىم- جومارت توقايەۆتى «Nur Otan» پارتياسىنان ق ر پرەزيدەنتتىگىنە كانديدات رەتىندە ۇسىندى. «Nur Otan» پارتياسى قاسىم-جومارت توقايەۆتىڭ كانديداتۋراسىن ءبىراۋىزدان قولداپ، داۋىس بەردى.
29 -مامىردا ق ر تۇڭعىش پرەزيدەنتى - ەلباسى نۇرسۇلتان نازاربايەۆقا جوعارى ەۋرازيالىق ەكونوميكالىق كەڭەستىڭ قۇرمەتتى ءتوراعاسى اتاعى بەرىلدى.
9 -ماۋسىمدا قازاقستان پرەزيدەنتىن كەزەكتەن تىس سايلاۋدا ەلباسى نۇرسۇلتان نازاربايەۆ ەلورداداعى وقۋشىلار سارايىندا ورنالاسقان №58-سايلاۋ ۋچاسكەسىندە داۋىس بەردى.
6 -ماۋسىمدا ق ر پارلامەنتى سەناتىندا تۇڭعىش پرەزيدەنت-ەلباسى نۇرسۇلتان نازاربايەۆقا «قۇرمەتتى سەناتور» توسبەلگىسى مەن كۋالىگى تابىستالدى.
21 -ماۋسىمدا نۇرسۇلتان نازاربايەۆ الماتىدا كەلەشەك ۇرپاققا ارنالعان ۋاقىت كاپسۋلاسىن قالادى. بۇل كاپسۋلا 30 جىلدان كەيىن 2049 -جىلدىڭ 22 -ماۋسىمىندا اشىلۋى ءتيىس.
12 -ماۋسىمدا ەلباسى جاڭادان سايلانعان ق ر پرەزيدەنتى قاسىم-جومارت توقايەۆتى ۇلىقتاۋ راسىمىنە قاتىستى.
21 -تامىزدا ق ر تۇڭعىش پرەزيدەنتىنىڭ توراعالىعىمەن «Nur Otan» پارتياسى ساياسي كەڭەسىنىڭ كەڭەيتىلگەن وتىرىسى ءوتتى. وندا ەلباسى ج و و- داعى پاراقورلىق، شەنەۋنىكتەردىڭ اشىق بولماۋى، ب ا ق-قا قىسىم كورسەتۋ سىندى وزەكتى ماسەلەلەردى كوتەردى.
29 -تامىزدا «يادرولىق قارۋسىز الەم جانە جاھاندىق قاۋىپسىزدىك ءۇشىن نازاربايەۆ سىيلىعىنىڭ» يەگەرلەرىن ماراپاتتادى. اتالعان سىيلىق ەلباسىنىڭ 2016 -جىلعى ساۋىردە ۆاشينگتونداعى يادرولىق قاۋىپسىزدىك سامميتى بارىسىندا جاريالانعان «الەم. XXI عاسىر» مانيفەسى يدەيالارىنا وراي بەكىتىلگەن.
7 -قىركۇيەكتە ەلباسى جۇمىس ساپارىمەن رەسەيگە بارىپ، ماسكەۋدەگى قالا كۇنى مەرەكەسىنە ارنالعان مەرەكەلىك كونسەرتكە قاتىستى.
24-قىركۇيەكتە ەۋرازيا ەلدەرى پارلامەنتتەرى ءتوراعالارىنىڭ IV كەڭەسىندە نۇرسۇلتان نازاربايەۆ ەلىمىزدىڭ تاۋەلسىزدىك جىلدارىنداعى جەتىستىكتەرى، جاڭا ءالىپبي، حالىقارالىق قۇجاتتار جانە بەيبىتشىلىك تۋرالى اڭگىمەلەدى.
15 -قازاندا تۇركىتىلدەس مەملەكەتتەر ىنتىماقتاستىق كەڭەسىنىڭ ماجىلىسىندە ق ر تۇڭعىش پرەزيدەنتى - ەلباسى نۇرسۇلتان نازاربايەۆ تۇركى الەمىنىڭ جوعارى وردەنىمەن ماراپاتتالدى.
سول كۇنى ەلباسى تۇركى كەڭەسى VII ءسامميتىنىڭ دەلەگاتسيا باسشىلارىمەن كەشكى اسقا قاتىستى.
22 -قازان كۇنى نۇرسۇلتان نازاربايەۆ جاپونيا يمپەراتورى نارۋحيتونىڭ تاققا وتىرۋىنا ارنالعان رەسمي شاراعا قاتىستى. ەلباسىن سالتاناتتى راسىمگە جاپونيا پرەمەر-ءمينيسترى سيندزو ابە ارنايى شاقىرعان بولاتىن.
جاپونيا ساپارىندا نۇرسۇلتان نازاربايەۆقا تسۋكۋبا ۋنيۆەرسيتەتىنىڭ قۇرمەتتى دوكتورى اتاعى بەرىلدى.
ال 24 -قازاندا ق ر تۇڭعىش پرەزيدەنتى قازاقستانعا كەلگەن تانىمال تەننيسشىلەر رافاەل نادالمەن جانە نوۆاك دجوكوۆيچپەن كەزدەستى. سپورتشىلار تۇڭعىش نۇرسۇلتان نازاربايەۆقا اۆتوگراف قويىلعان جەيدە سىيلادى.
25 -قازاندا نۇرسۇلتان نازاربايەۆ بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى.
22- قاراشانىڭ باسىندا ەلباسى نۇرسۇلتان نازاربايەۆ تۇركىستان وبلىسىنا جۇمىس ساپارىمەن بارىپ، جاڭارعان تۇركىستاندى ارالادى.
25 - قاراشادا نۇرسۇلتان نازاربايەۆ «Nur Otan» پارتياسى وبلىستىق فيليالدارىنىڭ وكىلدەرىمەن كەزدەستى. كەزدەسۋ بارىسىندا ەلباسى بەلسەندى مۇشەلەردى «Nur Otan» پارتياسىنىڭ دامۋىنا قوسقان ۇلەسى ءۇشىن «بەلسەندى قىزمەتى ءۇشىن» مەدالىمەن ماراپاتتادى.
اۆتور: ايجان سەرىكجان قىزى