الەم ارۋى-2019 بايقاۋىندا كورسەتىلەتىن قازاقستان تۋرالى ۆيدەوروليك جاريالاندى
شاعىن روليكتە قازاقستاننىڭ اتىنان شىعاتىن مادينا باتىق ءوزىنىڭ تۋعان ەلى تۋرالى بايان ەتەدى. قازاق جەرىنىڭ ەڭ كورىكتى ورىندارىن قامتۋعا تىرىسقان بويجەتكەن شىمبۇلاق، شارىن شاتقالى، قايىڭدى كولى، ەجەلگى ساۋران قالاسى مەن تۇركىستاندى، ەلوردانى تانىستىرادى. روليكتە قازاقتىڭ ۇلتتىق تاعامدارى مەن ويىندارىنا نازار اۋدارىلعان.
ايتا كەتسەك، «الەم ارۋى-2019» بايقاۋى 14 -جەلتوقساندا بيىل 69-رەت وتەدى. لوندونداعى بايقاۋعا الەمنىڭ 125 ەلىنەن ارۋلار ءوزارا باق سىناسادى.
ەسكە سالا كەتسەك، پاۆلودارلىق بويجەتكەن مادينا باتىقتىڭ «قازاقستان ارۋى» اتانعانىن بۇعان دەيىن حابارلاعان بولاتىنبىز. «قازاقستان ارۋى - 2019» بايقاۋى وسى جىلدىڭ مامىر ايىندا NOMAD City Hall ساحناسىندا وتكەن ەدى. قازىلار القاسى ەلىمىزدىڭ بارلىق وڭىرىنەن قاتىسقان 32 ارۋدىڭ تەك 5 ەۋىن سۋپەر-فينالعا شىعاردى. ولار ءۇش تاپسىرمانى ورىندادى: ءوزىن تانىستىرۋ، كيىم ۇلگىسىن كورسەتۋ جانە قىسقا مەتراجدى فيلم ارقىلى ءوز ءوڭىرىنىڭ تۋريستىك الەۋەتىن پاش ەتۋ.
اقىلىنا كوركى ساي ارۋدى قازاقستاندىقتار SMS- پەن ونلاين-داۋىس بەرۋ ارقىلى تاڭدادى. ونىڭ ناتيجەسىندە بيىلعى بايقاۋدىڭ جەڭىمپازى 19 جاستاعى پاۆلودارلىق ءمادينا باتىق اتاندى.
اۆتور: ايان بەكەن ۇلى