جەتىسايدا «قىس-2019» كوماندالىق وقۋ-جاتتىعۋى ءوتتى
شاراعا قاتىسقان اۋدان اكىمى جامانتاي بەيسەنبايەۆ بارلىق سالالىق بولىمدەردىڭ دايىندىعىن كورىپ، كەز كەلگەن ساتتە توتەنشە جاعدايعا دايىن بولۋ كەرەكتىگىن اتاپ ءوتتى، دەپ حابارلايدى قازاقپارات ءتىلشىسى.
وقۋ-جاتتىعۋدا سالا ماماندارى قىس كەزىندەگى توتەنشە جاعدايلاردى جويۋ جونىندەگى ءىس-ارەكەتتەرىن پىسىقتاپ، كوشىرۋ جانە ىشكى ىستەر ورگاندارىمەن ءوزارا ارەكەتتەسۋ جوسپارىن ناقتىلادى. سونداي-اق، بارلىق دەڭگەيدەگى اۆاريالىق-قۇتقارۋ، ديسپەتچەرلىك جانە بولجاۋ قىزمەتتەرىنىڭ جۇمىسىن، جەدەل كەزەكشىلىك پەن باسقارۋىنىڭ ۇيىمداستىرىلۋىن، حابارلاۋ جانە بايلانىس جۇيەسىنىڭ دايىندىعىن تەكسەردى. قىس كەزىندەگى ىقتيمال توتەنشە جاعدايلاردى جويۋ ءۇشىن قۇرىلعان اۆاريالىق-قۇتقارۋ قىزمەتىنىڭ قۇرىلىمى مەن قۇرال-سايماندارىنىڭ ەسەبى دە انىقتالدى.
جيىن بارىسىندا ەنەرگيا، گاز، جىلۋ، اۋىز سۋمەن قامتاماسىز ەتۋ جۇيەلەرىنىڭ جانە كولىك قاتىناستارىنىڭ جۇمىس ىستەۋگە دايىندىعى پىسىقتالدى. تاۋەلسىز ەنەرگيامەن قامتاماسىز ەتۋ كوزدەرىنىڭ، ماتەريالدىق-تەحنيكالىق، ازىق-تۇلىك، مەديتسينالىق جانە باسقا دا قورلاردىڭ شاماسى بەلگىلى بولدى. وقۋ-جاتتىعۋ بارىسىندا اۆاريالىق-قۇتقارۋ قىزمەتى جانە باسقا دا كەزەك كۇتتىرمەيتىن جۇمىستاردى جۇرگىزۋدە شۇعىل باسقارۋ الگوريتمدەرى جاسالدى.
حالىقتى شۇعىل حابارلاندىرۋ ءۇشىن اۋداندىق ورتالىقتاندىرىلعان حابارلاۋ جۇيەلەرى، داۋىس كۇشەيتكىش قۇرالدارى، تەلەديدار جانە باسقا دا ب ا ق ارقىلى تاراتۋ ءتارتىبى قارالدى.