تۇركىستاندا «پاراساتتى پوليتسەي-2019» بايقاۋى ءوتتى

None
None
تۇركىستان. قازاقپارات - بۇگىن تۇركىستاندا ءتارتىپ ساقشىلارىنىڭ قاتىسۋىمەن ءداستۇرلى وبلىستىق «پاراساتتى پوليتسەي» بايقاۋى ءوتتى، دەپ حابارلايدى قازاقپارات ءوڭىر باسشىسىنىڭ باسپا ءسوز قىزمەتىنە سىلتەمە جاساپ.

تۇركىستان وبلىسى پوليتسيا دەپارتامەنتىنىڭ ۇيىمداستىرۋىمەن وتكەن بايقاۋعا پوليتسيا دەپارتامەنتىنە قاراستى قالا-اۋدان پوليتسيا باسقارما بولىمدەرىنەن بارلىعى 13 كوماندا قاتىستى. تۇركىستان وبلىسى پوليتسيا دەپارتامەنتىنىڭ باسپا ءسوز قىزمەتىنىڭ باسشىسى، پوليتسيا پولكوۆنيگى سالتانات قاراكوزوۆا سايىسقا قاتىسۋشىلاردى قۇتتىقتاپ، بايقاۋدىڭ ماقساتىنا كەڭ كولەمدى توقتالىپ ءوتتى.

«بۇل بايقاۋدىڭ نەگىزگى ماقساتى - ق ر تۇڭعىش پرەزيدەنتى ن. نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن ىسكە اسىرۋ، «جاستار جىلىن» قولداۋعا بايلانىستى، جاس جانە بىلىكتى پوليتسەيلەردى تانىتۋ، پوليتسيا ماماندىعىنىڭ دەڭگەيىن ءوسىرىپ، وڭ يميدج قالىپتاستىرۋ. سونىمەن قاتار، ەڭ ماڭىزدىسى مەملەكەتتىك ءتىلىمىز «قازاق ءتىلىنىڭ» مارتەبەسىن نىعايتۋ»، - دەدى ول.

بايقاۋعا قاتىسۋشى پوليتسەيلەر جينالعان قاۋىمعا جان-جاقتى، سەگىز قىرلى ءبىر سىرلى ەكەندىگىن تانىتىپ، ءوز ونەرلەرىن، ءبىلىم-بىلىكتىلىگىن كورسەتتى. سونداي-اق، پوليتسەيدىڭ دە ءان شىرقاپ، ءبي بيلەپ، ءازىل ايتاتىنى، شىعارماشىلىققا جاقىندىعى جينالعان جۇرتتى ءسۇيسىندىردى.

«پاراساتتى پوليتسەي» بايقاۋىنىڭ قورىتىندىسىندا ءادىل قازىلار القاسىنىڭ شەشىمىمەن باس جۇلدە العان - تولەبي اۋدانىنان كەلگەن «تولەبي قىراندارى» كومانداسى ۇزدىك دەپ تانىلدى. ءبىرىنشى ورىندى - ارىستىق «ارىس ايبىنى» قانجىعاسىنا بايلاسا، ەكىنشى ورىندى - جەتىساي ا پ ب- ءنىڭ «قىران» توبى مەن شاردارالىق «شاردارا - شاعالا» كوماندالارى ءوزارا ءبولىستى. ال ءۇشىنشى ورىن - سارىاعاشتىق «سارىاعاش قىراندارى» جانە ورداباسى ا پ ب- ءنىڭ «ورداباسى قىراندارى» كوماندالارىنا بۇيىردى. بۇعان قوسا، 6 نوميناتسيا بويىنشا وزگە دە كوماندالار جەڭىمپاز بولىپ تانىلدى.

جالپى جۇلدەلى ورىندار مەن نوميناتسيالارعا يە بولعان كوماندالارعا باعالى سىيلىقتار مەن ديپلوم، العىسحاتتار تابىس ەتىلدى. تۇركىستان وبلىستىق پوليتسيا دەپارتامەنتىنىڭ «پاراساتتى پوليتسەي-2019» بايقاۋىندا جەڭىمپاز دەپ تانىلعان «تولەبي قىراندارى» كومانداسى رەسپۋبليكالىق بايقاۋعا جولداما ەنشىلەدى.

سوڭعى جاڭالىقتار