سايلاۋ-2019: كانديداتتار پرەزيدەنتتىككە ۇمىتكەر رەتىندە قانداي قۇجاتتار تاپسىرۋى ءتيىس؟
وتىرىستا اتالعان ماسەلە بويىنشا بايانداما جاساعان ق ر و س ك مۇشەسى باقىت مەلدەشوۆتىڭ اتاپ وتۋىنشە، پرەزيدەنتتىككە ۇمىتكەر كانديدات رەتىندە تىركەلۋ ءۇشىن ورتالىق سايلاۋ كوميسسياسىنا ەكى قۇجات ۇسىناتىن بولادى.
«ءبىرىنشى، مەملەكەتتىك كىرىستەر ورگاندارىنا كانديداتتىڭ جانە ونىڭ زايىبىنىڭ (جۇبايىنىڭ) تابىسى مەن مۇلكى تۋرالى سالىق دەكلاراتسياسىن تاپسىرعانى تۋرالى سالىق ورگاندارىنىڭ انىقتاماسىن ۇسىنۋى كەرەك. ەكىنشىسى - دەنساۋلىعىنىڭ جاي-كۇي تۋرالى مەديتسينالىق قورىتىندى ۇسىنۋ. اتالعان مىندەتتەر « قازاقستان رەسپۋبليكاسىنداعى سايلاۋ تۋرالى» ق ر كونستيتۋتسيالىق زاڭىنىڭ 59-بابى 5-تارماعى 4, 2, 6- تارماقشالارىنا نەگىزدەلىپ كورسەتىلگەن»، - دەدى ول.
ونىڭ ايتۋىنشا، سايلاۋ تۋرالى زاڭنىڭ 59-بابىنىڭ 2-تارماعىندا كانديداتتىڭ جانە ونىڭ زايىبىنىڭ (جۇبايىنىڭ) تۇرعىلىقتى جەرى بويىنشا مەملەكەتتىك كىرىستەر ورگاندارىنا ۇسىنۋ مەرزىمى باستالعان ايدىڭ ءبىرىنشى كۇنىندەگى، ياعني 2019-جىلعى 1- ساۋىردەگى كىرىستەرى مەن مۇلكى تۋرالى دەكلاراتسيانى ۇسىنۋى كوزدەلگەن. ورتالىق سايلاۋ كوميسسياسىنا مەملەكەتتىك كىرىستەر ورگانىنىڭ كانديداتتىڭ جانە ونىڭ زايىبىنىڭ (جۇبايىنىڭ) كىرىستەرى مەن مۇلكى تۋرالى دەكلاراتسيالاردى تاپسىرعانى تۋرالى انىقتاماسى كەز كەلگەن ۋاقىتتا پرەزيدەنتىككە كانديداتتى تىركەۋ مەرزىمى اياقتالعانعا دەيىن، ياعني 2019-جىلعى 11- مامىرعا دەيىن ۇسىنىلادى. كانديدات انىقتامانى ۇسىنباعان جاعدايدا تىركەۋدەن وتپەيدى. كانديدات تىركەلگەننەن كەيىن ورتالىق سايلاۋ كوميسسياسى كانديدات پەن ونىڭ زايىبى (جۇبايى) دەكلاراتسيالاعان كىرىستەرى مەن مۇلكى تۋرالى مالىمەتتەردىڭ دۇرىستىعى تۋرالى سۇراۋ سالۋدى ۋاكىلەتتى ورگانعا جىبەرەدى، ونى كانديدات تىركەلگەن كۇننەن باستاپ ون بەس كۇن ىشىندە مەملەكەتتىك كىرىستەر ورگاندارى تەكسەرەدى.
«بۇل رەتتە مەملەكەتتىك كىرىستەر ورگاندارىنىڭ كانديداتتىڭ جانە ونىڭ زايىبىنىڭ (جۇبايىنىڭ) كىرىستەرى مەن مۇلكى تۋرالى مالىمەتتەردى ۇسىنۋ تۋرالى تالاپتارىن العان ۇيىمدار تالاپتى العان كۇننەن باستاپ ءتورت كۇن ىشىندە سۇراتىلعان اقپاراتتى بەرۋگە مىندەتتى. دەكلاراتسيانى بەرۋ كەزىندە كانديدات نەمەسە ونىڭ زايىبى (جۇبايى) دەكلاراتسيالاعان كىرىستەرى مەن مۇلكى تۋرالى مالىمەتتەردىڭ دۇرىس ەمەستىگى انىقتالعان جاعدايدا ورتالىق سايلاۋ كوميسسياسى تىركەۋ تۋرالى شەشىمنىڭ كۇشىن جويادى»، - دەدى و س ك مۇشەسى.
سونىمەن قاتار ول «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ 59-بابىنىڭ 2-1-تارماعىنا سايكەس قازاقستان رەسپۋبليكاسىنىڭ پرەزيدەنتتىگىنە كانديدات تىركەلگەنگە دەيىن دەنساۋلىعىنىڭ جاي-كۇيى تۋرالى مەديتسينالىق قورىتىندىنى ورتالىق سايلاۋ كوميسسياسىنا مىندەتتى تۇردە ۇسىناتىندىعىن ايتتى.
وسى نورماعا سايكەس پرەزيدەنتتىككە كانديداتتىڭ رەسپۋبليكا پرەزيدەنتىنىڭ مىندەتتەرىن ورىنداۋىنا كەدەرگى كەلتىرەتىن اۋرۋلارىنىڭ جوقتىعىن راستاۋ ءۇشىن وعان مەديتسينالىق كۋالاندىرۋ جۇرگىزىلەدى. ونىڭ قورىتىندىسى دەنساۋلىق جاعدايى تۋرالى ءتيىستى مەديتسينالىق قورىتىندىمەن رەسىمدەلەدى. مەديتسينالىق قورىتىندىعا قويىلاتىن تالاپتاردى جانە رەسپۋبليكا پرەزيدەنتتىگىنە كانديدات بولىپ تىركەۋگە كەدەرگى كەلتىرەتىن اۋرۋلاردىڭ تىزبەسى، ورتالىق سايلاۋ كوميسسياسى مەن دەنساۋلىق ساقتاۋ سالاسىنداعى ۋاكىلەتتى ورگان - دەنساۋلىق ساقتاۋ مينيسترلىگىمەن بىرلەسكەن نورماتيۆتىك قۇقىقتىق اكتىسىمەن بەلگىلەنەدى»، - دەدى باقىت مەلدەشوۆ.