پاۆلودارلىق بويجەتكەن «قازاق ارۋى-2019» اتاندى
باسەكەگە 600 دەن اسا بويجەتكەن قاتىسۋعا نيەت تانىتقان. ولاردىڭ تەك 18 ءى ىرىكتەپ الىنىپ، سوڭعى سىنعا جولداما الدى.
«قازاق ارۋى» بايقاۋى بيىل 9-جىل ۇيىمداستىرىلدى. سايكەسىنشە، قاتىسۋشىلار اراسىنداعى باسەكەدە دە جوعارى بولدى. ۇيىمداستىرۋشىلار دا تالاپتى كۇشەيتە تۇسكەن.
«جىل سايىنعى تالاپ بۇل - قىز بالانىڭ سىرتقى سۇلۋلىعى عانا ەمەس، ىشكى جان-دۇنيەسىنىڭ باي بولۋى. قازاق ەلىنىڭ تاريحىن، مادەنيەتىن، سالت-ءداستۇرىن ءبىلۋ جانە ەڭ باستىسى قازاق ءتىلىن جەتىك ءبىلۋ»، - دەدى قازىلار القاسىنىڭ مۇشەسى ارمان سەيىتمامىت.
بۇعان قوسا، قىزداردىڭ بويى 170 سانتيمەتردەن كەم ەمەس، ال جاسى 22 دەن جوعارى بولماۋى ءتيىس. 18 ارۋ شەشۋشى سىندا 4 كەزەڭ بويىنشا ونەر كورسەتىپ، جىل ۇزدىگىن انىقتادى.
ناتيجەسىندە، «التىن ءتاج» پاۆلودار وبلىسىنىڭ نامىسىن قورعاعان ءسانيا تەمىرحانوۆاعا بۇيىردى. ول شىعارماشىلىق كەزەڭدە اباي ولەڭدەرىن جاتقا وقىپ، سۇلۋلىق پەن پاراساتتىلىقتىڭ جارقىن ۇلگىسىن كورسەتتى.
«قازاق ارۋى» دەگەن اتاققا لايىقتى قىزدىڭ اقىلى كوركىنە ساي بولۋى كەرەك. ءبىز وسىعان بايلانىستى تالاپتاردى كۇشەيتتىك. كەيىن سول ارۋدىڭ باسقالارعا ۇلگى بولعانىن قالايمىز»، - دەيدى بايقاۋدىڭ باس پروديۋسەرى بايان الاگوزوۆا.
بۇعان دەيىن «قازاق ارۋى - 2019» بايقاۋىنا كاستينگ جاريالانعانىن حابارلاعان بولاتىنبىز.