ۇلانباتىردا «كوشپەندىلەر قىسى 2019 - بۇركىت مەيرامى» وتەدى
شارا بۇركىتپەن اڭ اۋلاۋ سالت-ءداستۇرىن جانداندىرۋ، بولاشاق ۇرپاققا مۇراعا قالدىرۋ، وتاندىق جانە شەتەلدىك ساياحاتشىلارعا وسىناۋ بەكزات ونەردى ناسيحاتتاۋ ماقساتىندا ۇيىمداستىرىلماق، دەپ حابارلايدى قازاقپارات ءتىلشىسى.
«بيىلعى بۇركىتشىلەر تويى سايىس تۇرىندە جۇرەدى. ءىس-شارانىڭ باسىندا شاراعا قاتىسۋشى بۇركىتشىلەر ۇلتتىق كيىمدەرىن كيىپ، بۇركىتتەرىن قولدارىنا قوندىرىپ، اتقا ءمىنىپ ساپ تۇزەپ سالتاناتپەن ءوتۋى دە كوزدەلگەن. سايىستى قورتىندىلاعاندا، قاتىسۋشىلاردىڭ ءداستۇرلى ادەت-عۇرىپتاردى ساقتاۋىنا، كيىم كيۋ ءسان-سالتاناتى مەن تۇتىنعان اسەمدىك بۇيىمدارىنا ءمان بەرىلەدى. جانە ەڭ ءساندى ۇلتتىق كيىم، ات پەن بۇركىت ابزالدەرىنىڭ اسەمدىگىنە قاراي دا باعالانادى» - دەپ حابارلايدى ۇلانباتىر قالاسىنىڭ ساياحات-تۋريزيم باسقارماسى.
ايتا كەتەرلىگى، يۋنەسكونىڭ ادامزاتتىڭ ماتەريالدىق ەمەس مادەني مۇرالارى تىزىمىنە موڭعول ەلىنەن ءداستۇرلى اتباستى قوبىز ساز اسپابى، موڭعول حالقىنىڭ سوزىلمالى اۋەندەرى، موڭعول حالىقتىق «ناادام» فەستيۆالى، مونعولدىڭ كومەكەي ونەرى، بۇركىت تويى جانە قۇسبەگىلىك، موڭعولدىڭ ءداستۇرلى اعاش ءۇي جاساۋ قولونەر راسىمدەرى، موڭعولدىڭ اسىق اتۋ ويىنى سەكىلدى جەتى مادەني مۇرا تىركەلگەن.
«بۇركىتشىلەر تويى نەمەسە قۇسبەگىلىك» سالت-ءداستۇرى يۋنەسكونىڭ بۇل تىزىمىنە 2010-جىلى تىركەلدى. ورتالىق ازيا كوشپەندىلەرىنىڭ اراسىندا 6 مىڭ جىل بۇرىن قالىپتاسىپ، بۇگىنگە دەيىن ساباقتاسىپ جەتكەن بۇل ءداستۇر قازىرگى تاڭدا موڭعوليادا ەڭ جاقسى ساقتالعان.