نۇرسۇلتان نازاربايەۆ 2019 -جىلدى جاستار جىلى دەپ جاريالاۋدى ۇسىندى
«ءاربىر قازاقستاندىق جۇرگىزىلىپ جاتقان رەفورمالاردىڭ ءمانىن، ءمانىسىن، وتانىمىزدى وركەندەتۋ جولىنداعى ولاردىڭ ماڭىزىن ءجىتى ءتۇسىنۋى ءتيىس. ونى ءبىز جەتكىزە ءبىلۋىمىز كەرەك. رەفورمالاردى تابىستى جۇزەگە اسىرۋ ءۇشىن قوعامىمىزدى ورتاق ماقساتقا جۇمىلدىرۋ اسا ماڭىزدى. «رۋحاني جاڭعىرۋ» باعدارلاماسى جاپپاي قولداۋعا يە بولدى. قوعامداعى جاڭعىرۋ ۇردىستەرىنە تىڭ سەرپىن بەردى. وعان قوسىمشا «بەس الەۋمەتتى باستامانى» ايتتىق. بۇل باستامانى ءارى قاراي جالعاستىرىپ قويماي، ونىڭ اياسىن جاڭا مازمۇنمەن، جاڭا باعىتتارمەن كەڭەيتۋىمىز قاجەت» ، - دەدى پرەزيدەنت.
مەملەكەت باسشىسى جاستار مەن وتباسى ينستيتۋتىن كەشەندى قولداۋ - مەملەكەتتىك ساياساتتىڭ باسىمدىعىنا اينالۋى تيىستىگىن اتاپ ءوتتى.
«جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەك. كەلەسى جىلدى «جاستار جىلى» دەپ جاريالاۋدى ۇسىنامىن» ، - دەدى نۇرسۇلتان نازاربايەۆ.
ايتا كەتەيىك، ق ر پرەزيدەنتى نۇرسۇلتان نازاربايەۆ اقوردادا قازاقستان حالقىنا بيىلعى جولداۋىن جاريالادى.