2019 -جىلعى مەملەكەتتىڭ كىرىستەرى 95 ميلليارد تەڭگەگە ارتادى
بۇل تۋرالى بۇگىن ۇكىمەت وتىرىسىندا 2019 -جىلعى رەسپۋبليكالىق بيۋدجەتتى ناقتىلاۋ جونىندە بايانداعان ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«2019 -جىلعا ارنالعان رەسپۋبليكالىق بيۋدجەتتى ناقتىلاۋ اياسىندا ەلدىڭ الەۋمەتتىك- ەكونوميكالىق دامۋ بولجامىنىڭ نەگىزگى كورسەتكىشتەرىن ساقتاۋ ۇسىنىلادى. بۇل - جالپى ىشكى ءونىمنىڭ ءوسۋى 3,8 پايىز، مۇناي ءوندىرۋ 89 ميلليون توننا. الەمدىك مۇنايدىڭ باعالارى جوعارى قۇبىلمالىلىعىن كورسەتەدى. وسىنى ەسكەرە وتىرىپ مۇنايدىڭ بولجامدى باعاسى باررەلىنە 55 ا ق ش دوللارى دەڭگەيىندە ساقتالدى. جىلدىق ينفلياتسيانىڭ نىسانالى ءدالىزى 4,0-6,0 پايىز شەگىندە ساقتالىپ قالادى»، - دەدى مينيستر.
ونىڭ دەرەگىنشە، ناقتىلعان رەسپۋبليكالىق بيۋدجەت كىرىستەرىن 95 ميلليارد تەڭگەگە ارتتىرۋ ۇسىنىلادى. ولار: سالىقتىق تۇسىمدەر 12 ميلليارد تەڭگەگە، سالىقتىق ەمەس تۇسىمدەر 83 ميلليارد تەڭگەگە. سالىقتىق ەمەس تۇسىمدەر ىشىندە ديەۆيدەنتتەر 50 ميلليارد تەڭگەگە وسەدى جانە 66 ميلليارد تەڭگە بولادى. ال 33 ميلليارد تەڭگەگە ناقتى تۇسىمدەر.
«جالپى، ترانسفەرتتەردى ەسەپتەمەگەندە رەسپۋبليكالىق بيۋدجەتتىڭ كىرىستەرى 2019 -جىلى 7 تريلليون 81 ميلليارد تەڭگەنى قۇرايدى. تۇسىمدەر تۇرلەرى بويىنشا كىرىستەردىڭ قۇرىلىمى وزگەرمەيدى. ەڭ ۇلكەن ۇلەستى قوسىلعان قۇن سالىعى، كورپوراتيۆتىك تابىس سالىعى، حالىقارالىق ساۋداعا سالىناتىن سالىقتار الادى»، - دەدى رۋسلان دالەنوۆ.
ءمينيستردىڭ ايتۋىنشا، رەسپۋبليكالىق بيۋدجەتتىڭ تاپشىلىعى بۇرىن بەكىتىلگەن 1 تريلليون 365 ميلليارد تەڭگە دەڭگەيىندە ساقتالادى. مۇناي ەمەس تاپشىلىق، ياعني مۇناي كىرىستەردى قوسپاعاندا، جالپى ىشكى ونىمگە قاتىستى 8,5 پايىزدى نەمەسە 5,5 تريلليون تەڭگەنى قۇرايدى. مۇناي ەمەس تاپشىلىقتىڭ پارامەترلەرى بەكىتىلگەن فيسكالدىق ەرەجەلەرگە سايكەس كەلەدى.
«رەسپۋبليكالىق بيۋدجەتتىڭ پارامەترلەرى ناقتىلاۋدى ەسكەرە وتىرىپ مىناداي بولادى. تۇسىمدەردىڭ جالپى كولەمى 95 ميلليارد تەڭگەگە وسەدى جانە 10,7 تريلليون تەڭگەنى قۇرايدى. ترانسفەرتتەردىڭ تۇسىمدەرى، ونىڭ ىشىندە ۇلتتىق قوردان ترانسفەرتتەر وسپەيدى. شىعىستار 95 ميلليارد تەڭگەگە ارتادى. بۇل كىرىستەردىڭ وسۋىمەن سايكەس كەلەدى. رەسپۋبليكالىق بيۋدجەتتىڭ شىعىستار كولەمى 12 تريلليون تەڭگەدەن اسادى. وسىلايشا، تۇسىمدەر 10,7 تريلليون تەڭگەنى، شىعىستار 2 تريلليون تەڭگەنى، تاپشىلىق 1,4 تريلليون تەڭگەنى قۇرايدى»، - دەدى ول.
اۆتور: مارلان جيەمباي