قازاقستاندا 2018-جىلى رەكوردتىق دەڭگەيدە مۇناي ءوندىرىلدى

استانا. قازاقپارات - قازاقستاندا وتكەن جىلى رەكوردتىق دەڭگەيدە مۇناي مەن گاز ءوندىرىلدى، دەپ حابارلايدى قازاقپارات ءتىلشىسى.

«2018-جىل - ەلىمىزدىڭ وتىن-ەنەرگەتيكا كەشەنى سالاسىندا رەكوردتىق كورسەتكىشىمەن ەستە قالدى. تولىعىراق ايتقاندا، وتكەن جىلى ەلىمىزدە 90 ميلليون توننا مۇناي مەن 55 ميلليارد تەكشە مەتر گاز ءوندىرىلدى»، - دەدى ەنەرگەتيكا ۆيتسە-ءمينيسترى ءسابيت نۇرلىباي قازاقستانداعى ەكولوگيالىق جاۋاپكەرشىلىك بويىنشا مۇناي-گاز كومپانيالارىنىڭ رەيتينگىن جاريالاۋ سالتاناتىندا.

ايتا كەتەرلىگى، 2017-جىلى مۇناي ءوندىرىسىنىڭ كولەمى 86,2 ميلليون تونناعا جەتىپ، ونىڭ الدىنداعى جىلعا قاراعاندا 10,5 پايىز ءوسىمدى كورسەتكەن ەدى. وسى كورسەتكىشتىڭ ارقاسىندا ەلىمىز ىشكى جالپى ءونىمنىڭ مولشەرىن 4 پايىزعا ءوسىرۋ مۇمكىندىگىنە قول جەتكىزگەن ەدى.

ۆيتسە-مينيستر ءسابيت نۇرلىباي سونىمەن قاتار، قازاقستان رەسپۋبليكاسىنداعى ەكولوگيالىق كودەكستىڭ ماڭىزىن ارتتىرۋ شارۋاسى دا جۇرگىزىلىپ جاتقانىن تىلگە تيەك ەتتى.

«ەكولوگيالىق كودەكسكە ەنگىزىلەتىن وزگەرىستەر بويىنشا ەكولوگيالىق ستراتەگيالىق باعالاۋ جۇيەسى ەنگىزىلەدى. بۇل وتە ماڭىزدى باعىت. ءتورتىنشى مۇناي وڭدەۋ زاۋىتى تۇرعىزىلعالى جاتقاندىقتان، بۇل قادام ءبىزدىڭ ەكولوگياعا قالاي اسەر ەتەتىنىن ءبىلۋىمىز كەرەك»، - دەيدى ول.

ەسكە سالا كەتسەك، بۇعان دەيىن قازاقستانداعى ەكولوگيالىق جاۋاپكەرشىلىگى بويىنشا تۇزىلگەن مۇناي-گاز سالاسىنداعى كومپانيالارىنىڭ رەيتينگى جاريالانعانىن حابارلاعان بولاتىنبىز.