داۋرەن ابايەۆ 2018-جىلى اتقارىلعان جۇمىستار جايلى ەسەپ بەردى
«حالقىمىزدا «ەسكى جىل ەسىركە، جاڭا جىل جارىلقا» دەگەن اتالى ءسوز بار. راس، 2018 ءتۇرلى وقيعالار مەن جاڭالىققا تولى جىل بولدى. ءبىراز شارۋا اتقارىلدى، ىرگەلى ىستەر يگەرىلدى. اقپارات جانە كوممۋنيكاتسيالار مينيسترلىگىنىڭ ءبىر جىلداعى نەگىزگى جەتىستىكتەرىنە توقتالا كەتۋدى ءجون ساناپ وتىرمىن. ەڭ الدىمەن، «سيفرلىق قازاقستان» مەملەكەتتىك باعدارلاماسىن جۇزەگە اسىرۋ بويىنشا اۋقىمدى جۇمىستار قولعا الىندى. بىلتىر «استانا حاب» تەحنولوگيالىق پاركى ءوز جۇمىسىن باستادى. بۇل تەحنوپاركتىڭ اياسىندا بىلۋگە قۇمار، ۇيرەنۋگە ىنتالى جاستارىمىزدىڭ سيفرلىق مۇمكىندىكتەرىن دامىتۋ ءۇشىن جان-جاقتى جاعدايلاردىڭ بارلىعى قاراستىرىلعان. قازىر قازاقستاننىڭ بەس قالاسىندا سمارت سيتي تۇجىرىمداسى ىسكە قوسىلۋدا»، - دەدى داۋرەن ابايەۆ فەيسبۋكتەگى پاراقشاسىندا جاريا ەتكەن ۆيدەو ماتەريالىندا.
ونىڭ اتاپ وتۋىنشە، جىل بويى ەل تۇرعىندارىنا كورسەتىلەتىن مەملەكەتتىك قىزمەتتى ىڭعايلى قالىپقا تۇسىرۋگە باعىتتالعان جۇمىستار دا ءبىر ساتتە توقتاعان جوق. بىلتىر الدىمەن استانادا سودان كەيىن الماتى مەن شىمكەنت شاھارلارىندا جانە قوستاناي قالاسىندا سيفرلىق حالىققا قىزمەت كورسەتۋ ورتالىقتارى اشىلدى. سونداي-اق قازاقستاننىڭ 7 قالاسىندا ميگراتسيالىق قىزمەت كورسەتۋ ورتالىقتارى ىسكە قوسىلىپ، شەتەل ازاماتتارىنا «ءبىر تەرەزە» قاعيداسى بويىنشا قىزمەت كورسەتۋ جۇزەگە استى. 20 مىڭ شاقىرىمدى قۇرايتىن تالشىقتى-وپتيكالىق جەلى قۇرىلىسى باستالدى. بۇل شالعاي اۋىلداردى مەكەندەيتىن ەل تۇرعىندارىن ساپالى ينتەرنەتپەن قامتاماسىز ەتۋگە جول اشادى.
«قازاق تەلەۆيزياسىنىڭ 60 جىلدىق مەرەيتويى اتالىپ وتىلگەن جىلى، ياعني بىلتىر ايماقتاردى سيفرلىق حابار تاراتۋعا كوشىرىپ، انولوگتى حابار تاراتۋدى بىرتىندەپ توقتاتا باستادىق. شەكارالىق ايماقتاردا مەملەكەتتىك راديو حابارىن تاراتۋ جۇيەسىن دامىتۋ جۇمىستارى جالعاسىپ جاتىر. وزدەرىڭىز جاقسى بىلەسىزدەر، بۇل كوپتەگەن جىلدار بويى شەشىمىن تاپپاي كەلە جاتقان ماسەلە بولاتىن. ەلىمىزدىڭ جۋرناليستەرىن ىنتالاندىرۋ ماقساتىندا «ۇركەر»، «تۇمار» ۇلتتىق سىيلىقتارىن تابىستاۋ مەن مەديا سالانى جانداندىرۋ بويىنشا ۇيىمداستىرىلعان «استانا مەديا ۋيك» شاراسى دا تابىستى ءوتتى. وتاندىق تەلەارنالار مەن پروداكشن ستۋديالار قازىردىڭ وزىندە جوعارى رەيتينگكە يە بولعان 46 سەريال ءتۇسىردى. ءبىز ساندى ەمەس ساپانى ارتتىرۋعا كوپ كوڭىل بولدىك. مەملەكەتتىك تاپسىرىسپەن تۇسىرىلگەن سەريالداردىڭ جانرلارى دا سان-الۋان. تاريح، تانىم، ءتىل، ءداستۇر، سپورت تاقىرىپتارى دا كەڭىنەن قامتىلعان»، - دەدى مينيستر.
سونىمەن قاتار ول وتكەن جىلدىڭ قاراشا ايىنان باستاپ «ەگەمەن قازاقستان» گازەتى لاتىن الىپبيىمەن جازىلعان ماقالالارعا ءار سانىنىڭ ءبىر بەتىن ارناي باستاعاندىعىن اتاپ وتەدى.
«بۇل ۇلتتىق الىپبيىمىزگە دەگەن بەتبۇرىستىڭ العاشقى قادامدارىنىڭ ءبىرى رەتىندە تاريحتا قالاتىندىعى داۋسىز. تاماشا- TB تەلەارناسىنىڭ اشىلۋى دا وتكەن جىلدىڭ قازاق تەلەۆيزياسىنا بەرگەن سارقىتى. سونىمەن قاتار «قازاقستانىڭ 100 جاڭا ەسىمى» جوباسىنىڭ ەكىنشى كەزەڭى وتكىزىلدى. وسى ايدا قورىتىندىسى بەلگىلى بولادى. ال 2018-جىلى قازاقستان حالىقارالىق بالالار ەۋروۆيدەنيەسى بايقاۋىنا العاش رەت قاتىستى. بۇل ءبىزدىڭ ەۋروپالىق حابار تاراتۋ وداعىمەن بىرىككەن جۇمىسىمىزدىڭ وڭ ناتيجەسى. اشىق ۇكىمەت پورتالىنىڭ دا جۇمىسى وڭتايلاندىرىلدى. زاڭ جوبالارىن جەتىلدىرۋ جۇمىستارى دا جالعاسىپ جاتىر. بۇل 2018-جىلى اتقارىلعان جۇمىستاردىڭ ءبىر بولىگى عانا. ءبىر ادامنىڭ عانا ەمەس، ءسىز بەن ءبىزدىڭ ءبىر جۇدىرىقتاي جۇمىلىپ اتقارعان اۋقىمدى جۇمىستاردىڭ كورىنىسى. «جۇمىلا كوتەرگەن جۇك جەڭىل بولادى» دەيدى. سوندىقتان الدا ءبىزدى ءالى دە كوپتەگەن ىرگەلى ىستەر كۇتىپ تۇر. دەمەك، وتكەن جىلعا وكپە جوق، كەلەر جىلدان ءۇمىت كوپ»، - دەپ تۇيىندەيدى ءسوزىن داۋرەن ابايەۆ.