شەكاراسىز تىلشىلەر: 2018-جىلى الەمدە قانشا جۋرناليست قازا تاپتى؟

 استانا. قازاقپارات - جىل باسىنان بەرى الەمدە كاسىبي قىزمەتىنە بايلانىستى كەمىندە 80 جۋرناليست قازا تاپقان.

سەيسەنبى كۇنى «شەكاراسىز تىلشىلەر» قۇقىق قورعاۋ ۇيىمى قازا تاپقان جۋرناليستەر ءتىزىمىن جاريالادى. تىلشىلەر ءۇشىن ەڭ قاۋىپتى بەس ەلگە اۋعانستان (15 ادام)، سيريا (11)، مەكسيكا (9)، يەمەن (8) جانە ءۇندىستان (6) كىرگەن.

قۇقىق قورعاۋشىلاردىڭ ايتۋىنشا، مەكسيكادا قارۋلى قاقتىعىستار بولماعانمەن اتالعان مەملەكەت جۋرناليستەر ءۇشىن ەڭ قاۋىپتى ەلدەر قاتارىنا كىرىپ وتىر. 2018-جىلدىڭ 11 ايىندا اسكەري قاقتىعىس ايماقتارىندا 44 جۋرناليست كوز جۇمعان.

ۇيىمنىڭ دەرەگىنشە، قازىرگى كەزدە الەمدە 348 جۋرناليست قاماۋدا وتىر. ولاردىڭ 33 ءى ايەل. 2018-جىلى جەلتوقساندا ءبىر توپ جۋرناليسكە امەريكالىق Time جۋرنالى «جىل ادامى» اتاعىن بەرگەن. ولاردىڭ اراسىندا جۇمباق جاعدايدا كوز جۇمعان ساۋديالىق وپپوزيتسيالىق جۋرناليست جامال حاشوگگي، ميانمادا تۇتقىندالعان Reuters تىلشىلەرى، فيليپپيندىك جۋرناليست ماريا رەسسا، «ەحو موسكۆى» راديوستانتسياسى باس رەداكتورىنىڭ ورىنباسارى تاتيانا فەلگەنگاۋەر دە بار.

azattyq.org