ەلوردادا «استانا ارۋى -2018» انىقتالدى
بايقاۋدىڭ ىرىكتەۋ كەزەڭىنەن وتكەن 20 ارۋ ءبىر اپتا بويى قالادا وتكەن ءتۇرلى الەۋمەتتىك، سپورتتىق جانە قايىرىمدىلىق شارالارىنا قاتىستى. ونىڭ ىشىنەن اقتىق سىنعا جەتەۋى جولداما الدى.
بيىلعى بايقاۋدىڭ ەرەكشەلىگى، وتباسىلىق داستۇرلەر جانە ناعاشى جۇرتى بويىنشا ساباقتاستىققا ارنالدى. ياعني، قاتىسۋشىلار تانىستىرۋ ساتىندە وزدەرىنىڭ انالارى، اجەلەرى جانە ناعاشى جۇرتى تۋرالى بايانداپ، ولاردان جەتكەن وتباسىلىق جانە تاربيەلىك قۇندىلىقتار تۋرالى اڭگىمەلەپ بەردى.
سالتاناتتى كەشتى تانىمال تەلەجۇرگىزۋشى دينارا ءساتجان مەن بەلگىلى ءانشى بۇركىت جۇرگىزدى، سونداي-اق، ولارمەن جۇپتا كورەرمەندەر زالىنداعى «حابار» تەلەارناسىنىڭ تەلەجۇرگىزۋشىسى نۇرسۇلتان قۇرمانعالي دا اتسالىستى.
قازىلار القاسى مۇشەلەرىنىڭ قاتارىندا وتاندىق تانىمال قولونەرشى ىرزا تۇرسىنزادا، بوكسشى، وليمپيادا چەمپيونى سەرىك ساپيەۆ، مۋزىكانت ءارى كومپوزيتور ەرلان كوكەيەۆ، ID برەندىنىڭ ديزاينەرى زارينا اقشولاقوۆا، Faces كلۋبىنىڭ ارت-ديرەكتورى، تەلەجۇرگىزۋشى اسەل اقاسوۆا، فوتوگراف دانيل پوتوپ-پوليچينسكي جانە «قازاقستان ارۋى» ۇلتتىق بايقاۋىنىڭ ديرەكتورى الەنا ريۆلينا-قىرباسوۆا بولدى.
«مەن بۇعان دەيىن دە كوپتەگەن سۇلۋلىق بايقاۋلارىنا قاتىسىپ، قازىلار قاتارىنان كورىنىپ ءجۇرمىن. مەن ءۇشىن ارۋلاردى باعالاۋداعى باستى تالابىم بىرەۋ عانا، ول - قىزدارىمىزدىڭ رۋحى، ۇلتتىق نامىسىنىڭ بولۋى. ودان تىس، ارۋلارىمىز ەلىمىزدىڭ ءوسىپ-وركەندەۋى مەن دامۋىنا ءوز ۇلەستەرىن قوسسا دەگەن تىلەگىم بار. سۇلۋلىق ەكىنىڭ بىرىنە بەرىلە بەرمەيتىن قاسيەتتى سىي، ارۋلارىمىز سول سىيدى ابىرويمەن الىپ جۇرسە»، - دەدى بايقاۋدىڭ ءادىلقازىلار القاسىنىڭ ءتورايىمى ىرزا تۇرسىنزادا.
17 جاسار، قازاق تەحنولوگيا جانە بيزنەس ۋنيۆەرسيتەتى «ديزاين» ماماندىعىنىڭ 1- كۋرس ستۋدەنتى ەركەناز سەيفۋللا «استانا ارۋى- 2018» بايقاۋىنىڭ جەڭىمپازى اتاندى. وعان «قازاقستان ارۋى-2019» بايقاۋىنا قاتىسۋعا جولداما بەرىلدى.
«مەن ءۇشىن كۇتپەگەن ناتيجە، سوندىقتان جەڭىمپاز اتانعانىمدى ءالى سەزىنە قويعان جوقپىن. وسى تۇرعىدا وتباسىما، دوستارىما جانە بارلىق مەنى قولداعان جاندارعا العىسىمدى بىلدىرەمىن. بۇعان دەيىن ءوزىم وقيتىن ۋنيۆەرسيتەتتە وتكەن سۇلۋلىق بايقاۋىنا قاتىسىپ گران-ءپريدى جەڭىپ العانمىن»، - دەپ ءوز اسەرىمەن ءبولىستى ەركەناز سەيفۋللا.
سونداي-اق، استانانىڭ جاڭا ارۋى كىتاپ وقىعاندى ۇناتاتىنىن جانە ەندىگى ماقساتى «قازاقستان ارۋى» بايقاۋىنا لايىقتى تۇردە قاتىسۋ ەكەنىن ايتىپ ءوتتى.
ودان بولەك، بايقاۋدا الەكساندرا بەگلوۆا 1№ ۆيتسە-ميسس استانا، ءسانيا مەرگاليەۆا 2№ ۆيتسە-ميسس استانا جانە ديانا ىدىرىسوۆا 3№ ۆيتسە-ميسس استانا اتاندى.
سايىس بارىسىندا جۇلدىزدى قوناقتار رۇستەم جۇگىنىسوۆ، راحات لۋكۋم مەن Vox Acapella توپتارى كەش ءسانىن كىرگىزىپ ءان شىرقادى.
اتالعان شارا ق ر مادەنيەت جانە سپورت مينيسترلىگىنىڭ قولداۋىمەن وتكىزىلدى. ايتىپ وتسەك، بايقاۋدىڭ بيلەت ساتىلىمدارىنان تۇسكەن قارجى ارۋجان سايننىڭ قايىرىمدىلىق قورىنا اۋدارىلادى.