سەمەيلىك ارۋ ايەلدەر اراسىندا وتكەن «الەم ارۋى-2018» بايقاۋىن جەڭىپ الدى
فەستيۆالعا بارلىق جاس دارەجەلەرى بويىنشا الەمنىڭ 20-دان استام مەملەكەتىنەن ۇمىتكەرلەر قاتىستى. فينالعا شىعۋدان بۇرىن ۇمىتكەرلەردىڭ ءارقايسىسى ءوز ەلدەرىندە ۇيىمداستىرىلعان ىرىكتەۋ كەزەڭدەرىنەن وتكەن. ىرىكتەۋ كەزەڭدەرى رەسەي، مالتا، ماكەدونيا، قازاقستان، ۆەتنام، فرانسيا، ا ق ش، تۇركيا سياقتى وزگە دە ءبىرقاتار مەملەكەتتەردە ۇيىمداستىرىلعان.
بۇل تۋرالى ءوزىنىڭ الەۋمەتتىك جەلىدەگى پاراقشاسىندا بايقاۋعا قازاقستان اتىنان قاتىسقان ۇمىتكەر جاريا ەتتى. سەمەيلىك لەيلا قۇلجانوۆا ايەلدەر اراسىندا ۇيىمداستىرىلعان «الەم ارۋى - 2018» بايقاۋىنا قاتىسىپ، «Gold» دارەجەسىندەگى (36-40 جاس) «Grand-Prix-Mrs. World 2018» اتاعىن جەڭىپ العان.
لەيلا - ءتۇرلى ءسان بايقاۋلارىنىڭ جەڭىمپازى عانا ەمەس، ول سونىمەن قاتار مىقتى كاسىپكەر دە. ول بانك قۇرىلىمىن باسقارادى. قايرىمدىلىق شارالارىنا كوپ قاتىسادى، قازاقستاننىڭ ىسكەر ايەلدەر قاۋىمداستىعىنىڭ مۇشەسى.
بايقاۋعا قاتىسۋشىلاردىڭ بارلىعى دەمەۋشىلەردەن سىيلىقتار الدى. سونىمەن قاتار ولارعا پەر كاردەننىڭ جەتەكشىلىگىمەن وتەتىن «Universe Beauty 2019» سۇلۋلىق، ءسان جانە دارىن بايقاۋىنا قاتىسۋ ءۇشىن 50000 دوللاردىڭ سەرتيفيكاتتارى بەرىلدى.