سايات-2018: يتاليا مەن يسپانيادان قۇسبەگىلەر كەلدى
وعان ەلىمىزدىڭ بۇركىتشىلەرىمەن قاتار موڭعوليا، رەسەي، يتاليا، يسپانيا مەن ۆەنگريادان دا قۇسبەگىلەر قاتىستى. ساياتشىلىق - ەجەلدەن كوشپەندى حالىقتىڭ ۇلتتىق سالتى. بۇگىندە ول ۇلتتىق سپورت ءتۇرى سانالادى. بيىلعى ايتۋلى شاراعا ەلىمىزدىڭ 10 وبلىسىنان جانە شەتەلدەن 60-قا جۋىق قۇسبەگى كەلدى.
ولار قارشىعا، يتەلگى مەن قىران بۇركىتتەرىنىڭ بابىن سىناپ كوردى. كوپشىلىككە قارشىعالاردىڭ كوگەرشىندەرگە تۇسكەنى قىزىق بولعانىن كوردىك. شەشۋشى سىنداعى باسەكەدە قارشىعالار ءبىر- بىرىنە دەس بەرمەدى. دەگەنمەن جەڭىمپاز بىرەۋ- اق. تابيعاتتا قارشىعانىڭ نەگىزگى قورەگى قويان، كەپتەر، قىرعاۋىل مەن كەكىلىك سياقتى اڭ- قۇستار. بۇگىنگى جارىستا كوكداۋىل اتتى قارشىعا قويانعا دا ءتۇستى، كەپتەردى دە الدى. ءسويتىپ جارىستىڭ باس جۇلدەسىن جەڭىپ الدى.
دۋلات ابەن - قۇسبەگىلەر وتباسىنىڭ كەنجەسى. بۇل ءداستۇر اتادان بالاعا جالعاسىپ كەلەدى. جارىسقا اقبالاق اتتى ءبىر جاستاعى بالاپان بۇركىتىن العاش قوسىپ وتىر. ونى بىلتىر جازدا الاتاۋ بوكتەرىندەگى باقاي تاۋ قۇزىنداعى ۇيادان الىپتى. ءسويتىپ ماپەلەپ، قاناتىن قاتايتىپ وسىرگەن.
«ەڭ باسىندا ءتورت بۇرىشتىڭ ىشىندە ەركىن جۇرە الاتىنداي قورعانىس جاسايدى. بۇركىت كەتىپ قالماس ءۇشىن. وعان كۇندەلىكتى ەت بەرۋ كەرەك. مىنانىڭ بارلىعى قاپ- قارا بولىپ، اياعى سارعايادى»، - دەيدى جاس قۇسبەگى دۋلات ابەن.
ۇلتتىق ءداستۇر ۇلىقتالعان جارىستا يتاليا مەن يسپانيادان كەلگەن قوناقتار دا قىراندارىنىڭ بابىن بايقاپ كوردى. ەڭ قىزىقتى باسەكە بۇركىتتەردىڭ تۇلكى مەن قارساق الۋىندا بولدى. بۇل سىندا شىعىس قازاقستان وبلىسىنان كەلگەن ومىربەك نۇعىماننىڭ بۇركىتى تۇلكىگە مۇدىرمەي ءتۇسىپ، جارىستىڭ باس جۇلدەسىن يەسىنىڭ قانجىعاسىنا بايلادى. جۇلدەلى قۇسبەگىلەردىڭ بارلىعى ارنايى ديپلوم الىپ، اقشالاي سىيلىقپەن ماراپاتتالدى. شارا سوڭىندا ۇلتتىق اندەر اۋەلەپ، ەل رۋحىن اسقاقتاتقان جىر وقىلدى.
«مەن قازاقپىن اس بەرىپ، ات شاپتىرعان. بيە بايلاپ، توسكەيدە قوي باقتىرعان. كوك ءتاڭىرىسى قىراندى قولعا ۇيرەتىپ، جەر تاعىسى تۇلكىمەن ويناتتىرعان. مەن قازاقپىن اقجۇرەك اڭقىلداعان. كوڭىلى جومارت، نيەتى اق سارقىلماعان. جەر بەتىنە تارىداي شاشىلسام دا، دالامداي ساقتاپ كەلدىم داڭقىمدى امان»، - دەيدى قۇسبەگى تاتتىمبەت كاپ ۇلى.