وليمپيادا-2018: ءتورت بوكسشىمىز جارتىلاي فينالدا

استانا. قازاقپارات - بۋەنوس-ايرەستە ءوتىپ جاتقان جاس وسپىرىمدەر وليمپياداسىندا تاعى ەكى بوكسشىمىز جارتىلاي فينالعا شىقتى. وسىلايشا، «قولا» ءۇشىن تالاسۋ مۇمكىندىگىنە ازىرگە ءتورت بوكسشىمىز يە بولىپ وتىر، دەپ حابارلايدى قازاقپارات ءتىلشىسى.

ق ر ۇلتتىق وليمپيادالىق كوميتەتىنىڭ باسپا ءسوز قىزمەتىنەن حابارلاعانداي، بۇگىن تۇندە وتكەن ىرىكتەۋ جەكپە-جەكتەرىنىڭ ناتيجەسى بويىنشا، جارتىلاي فينالعا جولدامانى 91 كەلى ساناتىندا ونەر كورسەتەتىن ايبەك ورالباي مەن 64 كەلى سالماقتاعى تالعات شايكەن الدى.

ايبەك ورالباي شيرەك فينالدا چيليلىك اندرەس سالگادونى جەڭدى. ەندى ول جارتىلاي فينالدا پۋەرتوريكالىق ەلۆين كانالەسپەن جۇدىرىقتاسادى.

ال تالعات شايكەن جارتىلاي فينالعا شارشى الاڭعا شىقپاي-اق ءوتتى. سەبەبى ونىڭ شيرەك فينالداعى كوسوۆولىق قارسىلاسى ايقاسۋدان باس تارتقان.

اتالعان قوس بوكسشىمىزبەن بىرگە وليمپيادانىڭ شيرەك فينالىندا ايقاستارىن تاعى ەكى سپورتشى وتكىزدى. 91 كەلىدەن جوعارى سالماق دارەجەسىندەگى دامير تويباي ساموالىق قارسىلاسى تولاۋا تۋيگومالانىڭ جاراقاتىنا بايلانىستى جارتىلاي فينالعا جولدامانى رينگكە شىقپاستان الدى. ال قىزدار اراسىنداعى ايقاستا وتانداسىمىز جانسايا ءابدىرايىموۆا (48-51 كەلى) امەريكالىق دەستيني حيۆەن گارسياعا تورەشىلەر شەشىمىمەن 2:3 ەسەبىمەن جول بەرىپ قويدى.

بۇعان دەيىن 75 كەلىگە دەيىنگى سالماقتا سىنعا تۇسكەن نادەجدا ريابەتس شيرەك فينالدا پولشالىق ناتاليا گاجيەۆسكايانى 5:0 ەسەبىمەن جەڭىپ، جارتىلاي فينالعا وتكەن بولاتىن.

بۋەنوس-ايرەس استاناسى ارگەنتينادا -3 جازعى جاس وسپىرىمدەر وليمپياداسى 6-18- قازان ارالىعىندا وتەدى. وعان 206 مەملەكەتتەن 4 مىڭ سپورتشى قاتىسۋدا. جارىستار باعدارلاماسىنا سپورتتىڭ ءداستۇرلى 28 تۇرىنەن بولەك، سپورتتىق بيلەر (برەيك-دانس)، كاراتە، تاۋعا ورمەلەۋ، روليكپەن سىرعاناۋ قوسىلىپ وتىر.

بايراقتى دودادا ەل نامىسىن 58 سپورتشى قورعاۋدا.

اۆتور: كۇنسۇلتان وتارباي