قورعالجىندا «قوقيقاز-2018» فەستيۆالى وتەدى

None
None
كوكشەتاۋ. قازاقپارات - اقمولا وبلىسىنىڭ قورعالجىن اۋدانىندا 19-21 - قازان ارالىعىندا «قوقيقاز-2018» فەستيۆالى وتەدى، دەپ حابارلايدى قازاقپارات ءتىلشىسى «Visit Aqmola» تۋريستىك اقپاراتتىق ورتالىعىنا سىلتەمە جاساپ.

فەستيۆالدىڭ قوقيقاز اتانۋى تەكتەن تەك ەمەس. قورعالجىن - يۋنەسكونىڭ حالىقارالىق مۇرا تىزىمىنە كىرەتىن ەكى قورىقتىڭ ءبىرى. استانا قالاسىنان وڭتۇستىك- باتىسقا قاراي 130 شاقىرىم جەردە، قورعالجىن شۇڭقىرىندا ورنالاسقان. اۋدانى 259,9 مىڭ گەكتاردى قۇرايدى، ونىڭ 198 مىڭى - اكۆاتوريا. جالپى ايتقاندا، قورىق اۋماعى ەكى ۇلكەن تەڭىز جانە قورعالجىن كولىنەن تۇرادى. 1976 -جىلى تەڭىز- قورعالجىن كولدەرى حالىقارالىق ماڭىزى بار سۋ- تومار جەرلەرىنىڭ رامسار تىزىمىنە قوسىلعان بولاتىن. 2007 -جىلى ق م ت ق كولدەرى ІВА  باستى ورنيتولوگيالىق اۋماقتارىنىڭ حالىقارالىق جەلىسىنە ەنگىزىلدى. 2008 -جىلى ق م ت ق اۋماعى يۋنەسكو- نىڭ بۇكىل الەمدىك تابيعات مۇراسىنىڭ تىزىمىنە قوسىلدى.

 قورىقتىڭ بيوالۋاندىعى بىرەگەي. ول 374 وسىمدىك فلوراسى وكىلدەرى مەن قازاق ۇساق توبە فلوراسىنىڭ شيرەگى - 60 تۇقىمداستىقتان جانە سۋ مەن جەر بەتى جانۋارلارىنىڭ 1400 دەن استام تۇرىنەن تۇرادى. قورىقتا قۇستاردىڭ 346 ءتۇرى بار، ولاردان 126- ءى - ۇيا سالاتىندار. تەڭىز- قورعالجىن كولدەرىندە قۇستاردىڭ سۋ- تومار كەشەنى 112 تۇردەن تۇرادى، ول قازاقستانعا بەلگىلى 130-دىڭ 87 پايىزىن قۇرايدى. قورىقتا سۇتقورەكتىلەردىڭ 43، يحتيوفاۋنانىڭ 14 ءتۇرى بار.

جاندىكتەر تولىق زەرتتەلگەن جوق، تەك 700 تۇردەن استامى انىقتالدى، ءبىراق ولاردىڭ الۋانتۇرلىلگى 5000-عا جەتە الادى. قورىقتىڭ اۋماعىندا قىزىل كىتاپقا ەنگىزىلگەن جانۋارلار مەن وسىمدىكتەردىڭ 60-تان استام سيرەك ءتۇرى بەلگىلەندى. قۇستاردىڭ ىشىندە قىزىل كىتاپقا ەنگىزىلگەندەردىڭ ەڭ ادەمىسى - قىزعىلت قوقيقاز (فلامينگو) بولىپ وتىر. مۇندا كادىمگى قوقيقازدىڭ ۇيا سالۋ پوپۋلياتسياسى ورنالاسقان، ونىڭ سانى كەي جىلدارى 50-60 مىڭ باسقا جەتە الادى. العاش رەت 2005 -جىلى باستاۋ العان بايقاۋ وسىمەن 14-رەت ۇيىمداستىرىلىپ وتىر. ونىڭ 5 رەسپۋبليكالىق دەڭگەيدە.

 بۇل جولعى «قوقيقاز-2018» فەستيۆالىنە «قازاقستاننىڭ بيوالۋاندىعىن ساقتاۋ قورى» كوممەرتسيالىق ەمەس قورى، «قورعالجىن ەكولوگيالىق وبسەرۆاتورياسى» جانە «قورعالجىن مەملەكەتتىك تابيعي قورىعى» مەكەمەلەرى ۇيىمداستىرۋشىلىق تانىتۋدا. شاراعا قورعالجىن اۋداندىق اكىمدىگى، ەۋرازيالىق توپ (ERG)، اقمولا وبلىسىنىڭ تۋريزم باسقارماسى جانە قازاقستان رەسپۋبليكاسىنداعى ا ق ش ەلشىلىگى قولداۋ بىلدىرۋدە.

 فەستيۆال اياسىندا قولدانبالى ونەر شەبەرلەرى تۋىندىلارىنىڭ، كوركەمسۋرەت، فوتوسۋرەتتەر، بەينە رولليكتەر، ادەبي تۋىندىلار بايقاۋىنىڭ قورىتىندىسى شىعارىلادى.

اۆتور: اسلان وسپانوۆ

سوڭعى جاڭالىقتار